孖妹Ｓ檔案：分享災情傷勢 跟股佬學變招
恒指上星期再次失守兩萬一大關，明明早幾個月仲講緊「上望三萬點」定「四萬點」（口架）嘛，孖妹真係唔太接受到呢個痛過失戀嘅事實……股友慘輸坐艇嘅故事我哋已經聽得太多，今次轉搵幾位股評名家飲啖茶、食個包，八一八佢哋今年嘅個人投資經歷，定一定心神，再謀定後路。
正股全清倉玩衍品
沈：訊匯證券行政總裁 沈振盈
彩兒：沈大師，你最近人氣爆晒燈，好紅喎！而且恒指經歷股災洗禮，你嘅投資組合今年仲有兩、三成賺，仲唔係「人財兩得意」？
沈：舊年底滬港通推出後，港股咪出現一輪回調嘅？我因為堅信中央會利用股市帶動經濟、改善地方債問題同埋企業融資，再加埋舊年推出「新國九條」，料港股會爆升，咪即刻趁低入市儲貨，主打內銀、內險股同其他中資股，之後一半長揸，一半炒波幅，整體組合喺最高峰賺過五、六成。我好好彩六月尾已沽清所有正股股份，剩低約兩成資金短炒衍生工具，避過咗七、八月嘅大跌浪。
即使我股票投資額過百萬元，但係投資傾向保守，已不及九六至○○年時狠辣，怕炒輸賺唔番吖嘛，哈哈！我鍾意喺低位儲貨，如果學似有啲人27,000點、28,000點先嚟瞓身咪大鑊？我最開心係喺平保（02318）（拆細前）60蚊樓下掃正股及Call輪，其後喺90幾蚊全數沽出食胡；而且三、四月喺中信股份（00267）13蚊時大手掃正股同Call輪，之後喺16蚊沽清，啲輪閒閒哋都賺十倍、八倍。今年帶挈賺得最多就係呢兩隻愛股，要贏錢，兩注就夠晒喇！
煲平保中信Call輪
Kitty：咁你最近炒緊乜呀？不如沈大師為我指點迷津吖？
沈：近期我已經冇揸任何正股喇，只用衍生工具「刀仔鋸大樹」，目前主力炒平保與中信股份Call輪，並不時用小量指數Put輪及牛熊證做對沖。買入嘅窩輪主要喺十月或十一月到期，大多數時間只係運用5至10%資金炒，若然趨勢明顯頂多都係玩三至五隻，避免轉唔切身同控制番風險。
我依家唔會急住撈貨，主因市況暫未穩定，雖然唔少股份中長線嘅價值浮現，但短線仲受息口與資金流變化及去槓桿化等不明朗因素影響，最起碼要等美國落實係咪加息，內地推出可刺激經濟嘅行政措施，而非效果好似「放煙花」嘅貨幣政策，到時中港股市先可以見底。
好彩提早沽貨打和
彭：京華山一研究部主管 彭偉新（Castor）
Kitty：港股三月底開始進入大時代，恒指「Bom」一聲飆咗上去，嗰陣冇揸貨嘅股友個個都覺得好執輸，你當時有冇贏在起跑線？
彭：我舊年十月就開始滿倉，主因當時留意到市況開始轉強，咪因應市場熱門的投資主題建倉，最高峰時整體投資組合賺逾一倍，不過之後大跌市，啲盈利就還番畀佢喇。我六月下旬因為有資金需要，所以開始清倉，直至七月初大跌市就將全數持股沽出套現。好彩提早沽貨，回報最終打個和，冇輸凸，已經算執番身彩啦！
今年嘅市況真係完全預計唔到，上半年真係買乜升乜，鐵路股、航運股，好似廣州廣船（現稱中船防務，00317），以至細價股我都有炒過，喺我確信升勢時仲會運用孖展去炒添，回報最和味嘅係一啲實力股。
內地政策風險趕客
彩兒：港股自四月高位到依家，已經跌逾7,000點，你依家會唔會已經靜靜雞掃貨？
彭：喺四月已經留意到中港股市有見頂訊號，不過，中央政府做埋晒啲唔應該做嘅嘢去試圖控制股市，逼機構投資者入市又唔畀沽貨，正因有政策風險，大家一見到中央護盤都唔敢玩，仲唔係趕客？再者，內地對抗唔到環球市況，一味掩耳盜鈴托市係挽回唔到市場信心。
預言恒指見17500點
大市冇番生嘅曙光，現時我唔會考慮入市，完全冇揸住貨，我相信一三年六月嘅低位，即係跌到19,400點時，恒指會出現首個明顯反彈，但係大家都係一路彈一路走貨，其實熊市要跌足早前總升幅三分之二先有機會見底，所以恒指未來首步會見17,500點。
三成回報轉眼消失
鄧：君陽證券行政總裁 鄧聲興（Kenny）
Kitty：你日理萬機又家有嬌妻，唔通平時上財經節目做嘉賓嗰陣，其實係一心二用邊講邊炒？
鄧：我日日都要做節目，返到公司又有排山倒海嘅會議同訪問，邊夠膽放咁多錢用嚟炒股吖？我舊年底覺得A股市值與內地居民存款比例並不合理，而且市盈率處於低水平，仲預計中央勢激活股市，所以原本估算A股今年可彈升至6,000點，咪動用投資組合近七成資金認購一隻大中華股票基金，五、六月嗰陣收到基金嘅成績表好開心，因半年已經攞到三成回報，但係後來因為中央打擊場外配資等一系列政策，令股市急跌，隻基金依家只係得番幾個巴仙回報，幾乎只得個吉。
我用剩低三成資金短炒細價股，呢部分喺六月嗰陣最多賺逾一倍，不過目前已回落到兩至三成回報。喺新股同細價股炒得最癲嘅四至六月，我因為冇咁好耐性，所以冇抽新股，慣性只係掛牌首日追入，持貨一日沽貨獲利，當時建築股令我賺得較多，如果平均計，每隻都可以有兩至三成利潤嘅。
倘見底吼內險基建
我都試過短炒有殼股概念與其他三、四線嘅細價股，其中包括阿里系股份，但求旨在參與趁熱鬧。
彩兒：好多股友因為玩細價股而中伏，邊隻最傷你心？之後又會點部署？
鄧：上兩個月炒過隻科網創業板股，搞到蝕咗兩、三成，好彩本金唔多咋。其實喺多國齊齊量寬之後，環球股市波動性俱增，冇得唔信邪，資金流動性對股市升跌影響好大，所以炒股一定要鎖定利潤，設止賺位。特別係玩細價股一定要更小心，有15至20%跌幅就要止蝕。
其實我仲睇好內地股市嘅，現時港股已具吸引力，衰在市況未喘定，仲未係入市時機，喺未來兩個月，一旦中港股市見底，個人就會伺機吸納績優嘅內險股，例如國壽（02628），另預計內地將加大基建投資去推動經濟，所以亦打算收集基建股，好似中國中鐵（00390）及中鐵建（01186）。
若有料報畀彩兒同Kitty或有嘢問，可電郵money.biz@on.cc