Market Insight：開源節流應對逆境

G20財長和央行行長會議，日媒引述人行行長周小川談及A股三次提及「破裂」字眼，人行官網就引述周小川話調整已大致到位。老實講，與會者都是各國財金政策制訂同執行者，同行面前冇得唔講實話，承擔股市泡沫爆破並唔出奇，至於話調整係咪已經大致到位，仲要睇外圍點變化，所以用「大致」呢個字眼，亦屬恰當。

近兩三年雖然港股表現唔係太標青，但旅遊零售業向好，樓價高企，投資者都少理香港經濟數據。不過，八月份香港數據開始響警號，上周五日經與Markit聯合公布的八月份香港PPI跌至44.4，按月跌3.8，創逾六年低位，即係重返海嘯後的水平。

同時，香港私營企業連續五個月減產，就業水平更連跌17個月，八月份的裁員速度較七月加快。睇完呢啲數據，似乎淡友要將恒指踩落兩萬點關，不乏理由。

本港經濟受衝擊

事實上，中國經濟增長明顯放緩，對香港的影響本來就不輕，加上A股炒車和人仔走貶，在美國加息前加速了資金拆倉潮，總之一場亂局。香港作為一個極受外來因素影響的市場，經濟受衝擊是在所難免的，且別期望好快就能扭轉局勢，更何況本地樓市細價樓見頂，二手樓成交價開始回落，現水平的港股估值，說不上便宜，更要提防一旦外圍形勢再現動盪，估值將繼續受壓。

經濟不景氣，有甚麼可以先做作自保？無論是個人抑或企業，首先，當然是現金為王，別再輕率入市短炒撈貨等投機行為，損耗實力。其次是，檢討收入與開支，減省支出，開源節流，為過寒冬做好準備；做好財政管理，設法降低負債及妥善處理匯率風險，提升抗逆能力。但當然，經濟逆境唔係世界末日，逆境盡時好景自然來，周而復始，所以大家都係平常心看待經濟周期，最重要是做好自己，踏踏實實應對挑戰。

講開又講，本月二十八日會有月全食，有玄學家年初經已話，月全食前後不宜作大投資，特別係年尾可能會有大股災，到底呢個股災係咪經已喺第三季出現了，抑或第四季才真正「登場」，古勝都搞唔清。

美議息焉知非福

不過，記起今年正月有道兄轉述的港運流年批示，「五月聞名虎揚威、六月國情急轉下」，真係好應景，之後幾個月最值得留意的幾句係，「九月秋色漸覺涼……人情靜靜淡如水」、「十一大氣轉迷沉」、「十二流星天際過，周而復始再起動，無無有有本不着，全身而退不留情」。到底有何玄機，就等各位自行參透！

八卦話題講完，睇番本周市況，周初港股表現，將視乎A股復市後去向，惟觀閱兵前國家隊托市頂都係上到3,200點水平，睇嚟最樂觀的情況係在2,800至3,100點水平徘徊，而更大的波動，可能在下周聯儲局議息以及下周五「918」A股股指期貨前出現，理論上今個禮拜都係少做少錯，唔做唔錯！

不過，有兩點變數可以注意的是，喺內地監管部門不斷加強規管期指倉位之下，未來一兩個月A股股指期貨結算對市況的影響可能逐步減少。另一點係，若然月中聯儲局真係延後加息，話唔定本月下旬會來個反彈浪，順道做埋基金季結。

近期收到唔少飛鴿傳書問好唔好低吸內銀股，其實睇番幾家大行近期對內銀股的看法都唔係大家想像般咁淡，其中四月下調內銀股評級至跑輸大市的美銀美林，最近就提升內銀股的評級，皆因預期未來兩至三個月圍繞內銀股的最壞情況將會出現，站在一至兩年的投資角度，現時的估值具上升空間咁話。

內銀股汰弱留強

古勝就認為，逆境是考驗企業實力的時候，能夠捱過逆境，企業成長，業績自可再闖高峰。內銀股打開門就生意年年賺大錢的日子已成過去。

隨着利率市場化，同業競爭加劇，息差受壓，加上眼前經濟下滑，不良貸款率上升，行業經營情況備受挑戰。不過，同一時間，官方積極推動金融改革創新，新的機會湧現，內銀股將以個別發展，要突圍取勝，就要視乎財政實力、風險管理、創新能力和績效表現，其中長線招行（03968）及交行（03328）較值得期待。