絲絲講場：邁耶聖誕月生孖女
雅虎行政總裁邁耶就快生，今次係孖B女添。
40歲嘅邁耶，剛喺佢個Blog向大家晒喜事，佢仲話，喺佢同老公嘅家族史上從來都未試過有孖胎，今次係第一次。佢預產期係今年十二月。
唔怕做壞規矩 盡快復工
換言之，邁耶好快又要短暫離開工作崗位喇。記住，係短暫，怕且會係非常短暫添。事關邁耶出名係工作狂，上次（即是三年前）佢生完B後極速返工，引起一啲美國媽媽不滿，話佢做壞規矩，搞到佢哋都要好似邁耶咁盡快返工咁話喎。不過今次邁耶依然故我，講明會同上次一樣，盡可能地請少啲假，生完BB之後盡快復工。
邁耶後生就做到雅虎行政總裁、高薪厚職、人又靚、做嘢又叻、仲嫁到人、生完仔依家連孖女都畀佢中埋、女人仔做到咁認真犀利矣......呢段全部唔係絲絲講嘅，而係絲絲頭頂個阿頭講嘅，阿頭係麻甩佬一名。
余絲韻