絲絲講場：內地吉野家擺喜酒勝地？
尋日有人問喺內地經營吉野家嘅合興（00047）係唔係走緊大眾化路線。你覺得好奇怪？乜吉野家唔係一向都好大眾化嘅咩？咪咁想當然。吉野家曾經係內地擺酒勝地，知冇。
九十年代初首選
合興CEO洪明基（Marvin）話，九十年代初期至中期，吉野家係內地舉行婚禮嘅首選場地，嗰個年代，內地廿幾蚊一位屬於好高檔。當時喺吉野家包場擺結婚酒，就有啲似酒樓一圍圍咁，大家坐低派餐食，包咗場就唔使排隊點餐。
港男港女結婚想搞啲新意，心郁郁想北上搞番場另類擺酒？Sorry，依家內地吉野家冇再接呢類生意嘞。
至於無興趣結婚、只係想食飽再拼搏嘅，Marvin就話吉野家係食客嘅加油站。咁「加油站」會唔會加價？Marvin就話「嗱！加油站！我做法係點呢？加油站！即係你哋要食多啲肉......」到底加唔加價加唔加價加唔加價......如是者，Marvin終於話準備咗兩個加價方案。幾時推？因應市況喎。絲絲溫馨提示，講緊只係內地嘅吉野家。
余絲韻