絲絲講場：江老娘教睇業績兼嗒糖

自問自答夠感染力

江老娘以教書式嚟Present，Cosplay Miss江話「我們的收入達到多少呢？我們收入達3.48億（人民幣）。增長幅度是多少呢？（按年）增加了20.9%。」大家都好專心聽書，絲絲旁邊位酒店職員叔叔都豎起耳仔聽，連叔叔都感染到呢份開學嘅歡欣，大笑咗出聲。

Miss江講書又講到，人民幣匯率跌對公司出口冇影響，因為兌外幣仲反而有利銷售。財務部主管柯學寧亦幫口話，公司上半年冇做外匯對沖；而公司上半年78.8%負債比率全為人民幣債。

江老娘仲好愛大家，仲祝願大家身體健康、工作順利、男嘅靚仔女嘅靚女，大家行好運咁話！雖則盂蘭節剛過，但絲絲直頭感覺到新年。

江老娘連氣講咗十分鐘，講到口乾，就即席食粒喉糖，仲叫台下唔好客氣，一齊食！不過，台下大家都好客氣，未有嗒粒糖。落料咁足，段估都幾重口味。

仲有，講個秘密你知，江老娘係識講廣東話嘅！當佢要Sell自家產品時，即刻轉台用好純正嘅廣東話講「喉嚨痛？食金嗓子啦！」仲問大家佢講得好唔好。好，梗係，仲使問。

余絲韻