北水頭等倉：汽車板塊仍保持觀望
滬綜指昨日早段一度跌逾百點，但尾市國家隊出來力托權重股，結果守住3,100點樓上收市，但見上證380指數急挫6%，滬、深A股有逾兩千隻股份下跌，真係血流成河，預視閱兵後股指好大機會又再大開殺戒。眼見阿爺大派「紅包」，期指淡友怎不高興！
A股收市後，港股跌幅明顯擴大，即使金管局注資消息亦無助支持市況，埋單恒指唔見接近500點，似乎正在預先反映閱兵後下周A股的利淡行情。今年港股當A股升時跟唔足，A股跌就跌凸過人，真係做咗「地獄黑仔王」。
筆者呢排「口淡淡」，但以事論事，不存在刻意唱淡。軍工股炒作重組概念經已有一段時間，會唔會在閱兵後來一次洗白白，總之各位要睇路！
銷售增長持續放緩
事實上，除概念板塊鑊氣全消之外，呢轉港股反彈中小型股份唔跟彈，足以反映投資者信心低迷，食「彈散」係心裏有數。近日就連重磅中資股失守「708」股災日低位創52周低，如蒙牛（02319）昨日跌6.8%，收報25.25元；建行（00939）公布完中績之後，股價創52周新低5.33元，恐怕又係新一輪跌浪先兆。
再睇下汽車股板塊，昨日有兩隻逆市高收，分別是東風（00489）及北京汽車（01958），同升逾2%。其實今年第二季經已見到內地汽車銷售增長開始放緩，無論造車抑或分銷都受影響，估值受壓，次季初汽車股已開始集體跳水，現價相對去年底仍有得升的只有吉利汽車（00175）同比亞迪（01211），長城汽車（02333）的「飛車」飛出事，今年以來股價累跌逾五成。
展望第四季，以行業景氣而言，不見得汽車股具備大幅反彈的條件，惟新能源汽車受國策支持，還可以望多兩眼。東風上半年中期賺68.85億元人民幣，按年跌19%，預計下半年經營環境仍極具挑戰。
近日其股價跌至○九年七月以來低位，可以講股價表現已預先反映行業淡風。見到近日股價下跌成交放量，似乎有人遲官歸故里，有人漏夜趕科場，惟在有更多數據支持行業回穩前，還是審慎行事為妙。
司慕渢