Market Insight：弱過藥煲 避險為上

上周的死貓彈經已完成，再度下跌的原因又是中國經濟。昨公布的官方八月PMI終於跌穿50，雖然市場對數據早打定輸數，八月份股市大跌、天津爆炸及北京閱兵前工廠停工，如果數據好反而令人難以置信；不過，50始終是重要心理關口，而近期投資者人心虛怯，標普期指在亞洲時段大部分時間跌逾30點，日經大瀉724點，德股早段再跌穿萬關，睇聯儲局仲敢唔敢提加息？

全球對中國經濟憂心忡忡，但位於震央的滬綜指卻僅跌1.23%，全靠托住銀行股，建行A股（601939.SH）升8.7%，惟深成指及創指分別跌3.67%及5.38%，再有千股跌停。

又話不再唯GDP論，又話不再唯指數論，但不斷自打嘴巴。國家隊買銀行股總好過買中小板，因為銀行是整個經濟命脈，既要救股市、救樓市、救人民幣相當唔得閒，可能將令自己失救。

追買油股隨時摸頂

港股主板成交858億元，滬深加埋約7,000億元人仔，仍係1：10之比，但估計A股成交將逐步萎縮，托市有邊際效用遞減，股民哀莫大於心死。中證監亦希望甩身，呼籲上市公司積極回購及分紅，甚至發債去回購。上市公司的資金應該用以發展新業務，再不濟亦可減輕債務，用以回購有效法美國企業之嫌；惟中美企業大不同，資金成本亦有極大差距。

昨日沽空金額佔總成交13%，期指低水逾300點，夜期再跌，即使計及本月派息因素，今日已有機會跌穿21,000點。股市跌跌不休，但油價和人民幣連升三日，尤其油價一升就兩成幾，勝過股市彈唔起不知多少倍。不過，現時追油股又怕摸頂，正如見油價跌買航空股一樣隨時是陷阱，中海油（00883）昨跌4%。

強勢板塊逐一跪低

蒙牛（02319）再冧莊成最差藍籌，由45蚊跌到25蚊足足唔見44%，低過晒大行的目標價；蒙牛上半年多賺28%，話晒好過市場預期，今年預測市盈率約15倍為估值歷史低位，通常跌市都不宜心急博反彈，但呢隻似乎爛船都有三斤釘。

澳門宣布緊縮措施，冇聽錯，係澳門，唔係希臘；其次季經濟萎縮26.4%，緊縮措施表明對未來一段時間都不看好。而前日公布之本港零售及訪港旅客進一步下跌，中國唔好，香港及澳門亦唔好，百麗國際（01880）傳自家品牌退出香港，所謂零售業寒冬毋庸多言。

連近期最強勢的藥業股都要跪低，閱兵前夕軍工股亦散水格，大市一路跌，所有股份亦難幸免，只是時辰未到而已。但古勝職責所在，叫人忍手之餘，亦可談論一些公司的基本因素。數碼通（00315）昨公布全年業績，全年純利升74%至9.4億元，好過市場預期，新市盈率為15.6倍，並提高派息比率至75%，全年派息6毫子，息率達4.2%。

通常高過4厘已可稱高息股，加上電訊股一向穩穩陣陣，其他消費可慳但電話及數據費用就唔慳得，所以隻股向來在跌市期間跑贏大市，昨亦逆市升2.7%。

數碼通有貨可續持

數碼通業績的確無大挑剔之處，連香港客戶人數亦可升4%，服務收入則升3%，但部分被不斷下跌的漫遊業務收入所抵銷。手機及配件銷售上升67%，成為主要增長來源，iPhone 6推出使去年度此方面收入特別高增長，但市場飽和之後，未來增長相信難以維持。

雖然蘋果公司本月稍後又推新手機，惟iPhone 6屬萬眾期待，換機後估計會有段真空期。各電訊商現時都積極推展換機計劃，但係睇現時經濟環境，世界多個地方均出現智能手機銷售回落，不能再盲目樂觀。

今次業績估計會為數碼通股價來個沖喜，市淡時其亦為避險選擇之一，估值並不算貴，該股可作長線投資，有貨者不妨繼續持有，未有貨者今日不宜高追，寧待其股價回落時才吼，熊市低位買貨機會多的是。

古勝