絲絲講場：第二代上陣孭飛唔靠父幹
家陣原來上到大學都要交家長回條，睇到絲絲滴汗，跟住嚟會唔會係親子O Camp呢可......好彩，尋日畀絲絲見番啲企業年輕二代出嚟，不單唔使阿爸傍住，仲直頭代阿爸撐起個場，絲絲咁先叫見到啲曙光。
天能主席千金會傳媒
古有花木蘭代父從軍，今有天能動力（00819）主席張天任因公務在身，由佢千金張楊（Annie）代父見傳媒。Annie自爆喺公司未有正式Title，依家仲係了解緊公司。絲絲覺佢完全溫足書。
擁有碩士學位嘅Annie喺英國讀企業管理，睇嚟會接阿爸公司棒啦可？點知佢話「仲考慮緊」，未必入阿爸公司做。事關Annie對金融有興趣啲，想去外面啲公司睇睇學多啲，想用自己能力創出新天地。阿爸會唔會嬲豬？Annie話阿爸好民主，由細到大都唔逼佢。
紀惠湯氏兄妹開記招
咁啱，尋日有另一對二代兄妹出嚟擔大旗，就係紀惠副主席湯文亮對仔女湯振傑同湯振玲。紀惠公布旗下跑馬地住宅物業放租記招，兩兄妹第一次全程自己開記招，完全唔使阿爸喺度傍住。
阿哥湯振傑其實唔係新手，佢喺第一太平戴維斯已經做咗十年，因為紀惠Project愈來愈多，屋企人又多公職，所以佢今年五月就返紀惠幫手。而阿妹湯振玲，主要幫手同銀行傾貸款。
作者：余絲韻