呢個消息，若然唔覺意令到你有些少空虛，唔好意思。各位嘅「股壇小甜心」，即是金英証券（香港）零售研究部副總監李韻儀（Sonija），話自己「三十而立」，要暫別幕前，連專欄都暫收筆，佢話希望退居幕後，專注深入嘅證券分析工作。
點解唔留番個專欄Keep吓人氣？Sonija話自己亦係凡夫俗子，向虛榮Say No亦唔係易事，不過既然決定轉型，專注證券分析工作，就要專心一致。
Sonija又話，自己其實唔鍾意講嘢，亦唔識講嘢，呢七年股評人生涯，佢其實每晚喺屋企練習朗讀報紙，仲叫埋屋企人扮節目嘅家庭觀眾同主持，幫佢訓練應對。
當年被人叫做「全港最年輕股評人」，Sonija就決心要考番啲專業資格，以補投資歷練不足，呢四年佢就攞到財金風險管理分析師（FRM）同特許金融分析師（CFA）資格。
佢話衷心感謝讀者同前輩嘅支持及鼓勵，祝各位投資得利。你係Fans？放心，Sonija點會唔記得你哋，佢有話「後會有期」。話時話，舊年睇住Sonija結婚，你哋都係咁過啦，振作啲。
余絲韻