絲絲講場：糧包張總讚大媽夠強

金股皆傷 廣場舞照跳

首先欣賞到大媽呢份內在美嘅，係中糧包裝（00906）主席張新（張總），張總尋日同絲絲講，就算內地股災，A股股民都好堅強嘅，話晒都經歷咗幾十年股市上落，都仍然係咁。佢仲話，啲大媽以前買黃金輸咗錢，咪又係喺廣場跳舞；張總仲話股市春風吹又生。

又係呢句「春風吹又生」！？早兩日，中州證券（01375）董事會秘書徐海軍（徐總）先引用過唐代詩人白居易呢句詩，嚟安撫「受傷的股民」。以絲絲大腦非正式統計，「春風吹又生」可能係內地企業阿總最愛嘅詩句，定係原來連安撫「災民」嘅口徑都「被一致」埋呢可？

張總話，上半年經濟波動，但公司銷量都Keep到，所以佢覺得，股災其實對實體經濟影響有限，兩者關係唔大。張總仲話，股災都有積極嘅一面，內地股民會更專注工作。

欣賞香港價值投資者

講到A股，咁中糧包裝會唔會回歸A股？張總話唔會喇，因為佢哋鍾意香港，仲非常鍾意香港嘅「價值投資者」，比起內地嘅「概念投資者」更睇重公司業務。

講番股災，除咗吟詩外，有冇啲實際嘢去安撫「災民」？絲絲聽講內地有企業畀員工放「股災假」散吓心。張總話明冇，事關母公司中糧集團仲有其他包裝業務，未來可能會注入公司。戰略部總經理黃進仲話，公司「多訂單，要幹活」，唔可能放假影響進度。

咁呀，大家跳住舞先。

余絲韻