絲絲講場：公司業績掂 舵手身體好？
無論係藍籌定係細價股，公司一有咩頭暈發燒，舵手都好易食唔安、瞓唔落。照咁睇，公司業績好，舵手身體先會好。唔信？聽吓恒安（01044）副主席兼CEO許連捷同埋好孩子（01086）主席宋鄭還點講。
許連捷尋日坦承公司業績呢兩年唔多理想，仲話今年初自己身體都有啲問題，大有可能同業績差有關。不過家陣身體已好得多，仲準備緊退休。
好孩子添兩高層
咁啱，宋鄭還尋日亦話，覺得自己今年輕鬆咗，無以前咁緊張，因為有新CEO及COO加盟，成個團隊都多咗各方能力之士參與。絲絲睇，佢又真係笑多咗喎。
余絲韻