內房企近年多咗好多新詞彙，好似「輕資產」、「互聯網+」咁，不過「地產狂人」融創中國（01918）主席孫宏斌（孫總）睇嚟就唔多受新呢一套，佢認為房地產商應該要腳踏實地買地起樓。
事關唔少內房企都話搞O2O（線上到線下）概念，但孫總尋日話，互聯網佢知係一個工具，但就唔明「+」係咩意思喎。
近幾年，啲內房開口埋口都講「輕資產」（即是減低項目中佔股比例，甚至搵人出錢投資，自己只負責營運）。孫總就話「用別人的錢就是輕資產？這個是很荒唐的，你如果覺得這個是好項目就自己投資自己賺錢！」
融創近排成立咗間物業管理公司，孫總講明唔係為咗分拆抽水，佢又話好似辦教育就唔應該用嚟賺錢，會降低辦學能力咁話。咦，絲絲記得，碧桂園（02007）先前咪話想分拆學校、酒店同物管業務上市囉。
余絲韻