絲絲講場：領展街市推i-Chicken

電子化揀雞一條龍

點「i-Chicken」法？就係可以用電子屏幕揀你睇中嗰隻雞，揀完雞，等大概三十分鐘，就會有隻劏好嘅雞速遞到檔口。

呢個咁High-Tech嘅概念，無非為解除大家去街市買餸揀活雞嘅衞生憂慮，事關呢個「i-Chicken」活雞攤檔實際冇活雞喺檔口，大家全程唔使接觸活雞，唔使睇到啲暴力場面。除此以外，聽講仲會有24小時新鮮生果自動販賣機添。驚唔驚唔曉用呢可。

領展CEO王國龍（George）大大話話睇住領展上市十年，代表作唔少，尤其係舊年十一月領展「染藍」做咗恒指成分股。原來過程唔簡單，George話前後花足四年時間游說，領展先獲「加冕」納入藍籌之列，仲要係第一隻藍籌REITs。

與房委「分產」有橋

當初房委會分拆公屋商場及停車場出嚟，由領展接收，啲地契要重搞過。邊忽邊個管、管轄範圍點分，George尋日就爆咗個小秘密。原來係以商場外牆簷篷為界，內邊無雨水滴到嘅就歸領展管，外邊有雨水滴到嘅就屬房署理。係真唔係？George係咁同絲絲講。

領匯改名做領展，各位頭頭即派新卡片。咦，有兩款唔同：一款印埋靚靚頭相，另一款冇。聽講無相嘅就派畀熟人，有相嘅就派畀新朋友等人哋容易記得。咁，絲絲收到嗰張……

余絲韻