北水頭等倉：電力股好淡因素並存

到底減息降準係咪真係靈丹妙藥，對環球股市的刺激有多大，要做事後孔明。不過，筆者都係傾向保守啲，若然早前未及減持，應該好好把握反彈減持的機會，總之將持倉水平調節至可控範圍內，切忌以孖展博反彈，火中取栗唔成分分鐘火燒身。

概念股需要長抖

理論上，大跌市過後，首要留意的應該是重磅股而唔係二三線股，只要股場人氣冷靜下來，重磅股應該是較值博的，因為既可攻又可守。反觀次季熱炒的概念股，睇怕要較長時間整固，少做少錯。

近期油價不斷探底，煤價亦只可以跟着跌。本來煤價下跌意味着火電發電成本下降，有利電企毛利率表現。之不過，計及經濟增長顯著放緩之下，電力需求亦同時受拖累，故充其量只是好淡因素互相抵銷，不能單單以煤炭價格下跌來作為看好電力股的原因。

環顧五大中資電力股，華潤電力（00836）、大唐（00991）、華電（01071）及華能（00902）今年以來股價累積跌幅分別為9.3%、31%、18%及21%，僅中國電力（02380）仍有15%升幅，表現勝同業相信與憧憬注資有關。純睇走勢，中國電力昨跌至250日線4.4元回穩，再下一個較大的承接區則在3.8至4元，反彈首站阻力在4.8元水平。

司慕渢