絲絲廣場：楊永仁搞美容唔肯「出面」
恒發洋參（00911）搞埋美容！尋日恒發洋參中期業績發布會，公司即將推美容產品，呢啲日子，要講梗係講護膚。主席楊永仁年近50，但睇嚟唔多似，楊主席話之前冇咩點搽嘢，不過依家都考慮用喇。
搵「沈大師」代言
咁當然，又唔會只講護膚啦。近排本港零售市道差，舖租跌，會唔會趁勢開多幾間舖？楊主席話唔啦，佢嫌香港舖租始終太貴，佢哋公司唔需要靠太多實體店作招徠提升生意額，做VIP熟客生意根本唔使靠實體店，佢仲話要「用好少嘅錢，去做好大嘅生意。」
既然係咁，公司嚟緊啲美容產品，佢自己會唔會親身做代言人，慳番代言費？楊主席話No喎，因為唔想上電視咁話。
其實，佢哋嘅美容產品已經有代言人，就係沈大師，包裝會有沈大師個「嘜頭」添。定啲嚟，唔係股評嗰位沈大師，係藝人沈卓盈。
余絲韻