絲絲廣場：中州老總吟詩慰股民
環球大冧市，恒指尋日咁就瀉咗過千點，全城變晒「阿愁」、「阿躁」同「阿驚」，做證券業嘅就仲傷，股市跌，個個睇淡後市，成交跟住縮，嚟緊佣金肯定唔見大截。咁嘅時勢，估唔到證券業竟然仲有一個「阿樂」，佢話呢幾日冇因為跌市而唔開心，尋日仲吟埋詩嚟安撫各位脆弱的心。
「春風總會再吹來……」
呢位「阿樂」，就係中州證券（01375）董事會秘書徐海軍（徐總）。股市冧到如斯田地，券商通常出嚟會講後市乜乜乜、股民應該低撈定掟貨點點點，估唔到徐總尋日出到吟詩呢招，果然新奇。
徐總話，股票有升有跌好正常，又話「在低位買，高位離去先有收益」，即是跌市先有機會。至於點睇後市，佢就引用南宋詩人陸游《遊山西村》嗰句「山重水複疑無路，柳暗花明又一村」，同埋唐代詩人白居易嗰句「野火燒不盡，春風吹又生」，徐總仲安慰股民話「春風總會再吹來」。
徐總唔係得個講字，佢哋真係等緊「春風」。話說佢哋集團七月先啱啱喺香港成立咗子公司中州國際金控，但近期市況轉差，佢哋嘅海外拓展會唔會放慢啲啲？點知徐總話，仲打算喺香港用併購或者合作方式，嚟攞個證監會發嘅「就機構融資提供意見」嘅牌照，即係俗稱「六號牌」，仲話想喺今年內搞掂；徐總話子公司係集團海外資金配置渠道，「這幾天市場不好，但（香港業務）健康發展的決心不變」。
上面嗰幾句詩，徐總話自己細細個就識，絲絲段估你都一樣。至於詩嘅意境……絲絲梗係唔講呢啲。唔理安唔安慰得到，點都叫做有心吖。咦，陸游呢句「山重水複疑無路」，好似周不時被誤傳為「山窮水盡疑無路」嘅喎！個心即刻離一離添……
余絲韻