孖妹S檔案：專家教吼位炒匯無得輸
有外電調查話，人仔淡倉係5年幾以嚟最大規模，唔少分析都預期匯價仲有得跌，兼且中國經濟持續放緩令商品貨幣重挫。依家貨幣市場立立亂，不過匯市波濤洶湧反令唔少投資者流晒口水，唔通依家就係孖妹變身匯市小炒后嘅時機？
人仔長線仍強 睇6.2
黃：百利好金業（香港）研究部董事 黃耀明
彩兒：人民幣匯價跌勢似未止血，唔少做咗人仔定存嘅朋友擔心賺息蝕價，惟有忍痛提早斬纜。
黃：市場揣測人行舉措背後意圖係為推動出口，不過人行聲明話係為咗增強人民幣兌美元匯率中間價嘅市場化程序同基準性，完善中間價報價，過分解讀人行心意或作太多聯想其實好危險，揣測都冇用。
我預計美元兌人民幣短期匯價有機會回升到6.7至6.8水平，但長線人民幣仲係強勢貨幣，未來一年相信可回落到6.2至6.3水平，投資者毋須因短線蝕匯價而急於取消定存。
再者，人行都強調人民幣唔存在持續貶值嘅基礎，其實人民幣匯價自○五年匯改後高速增長，至今累升約三成，隨住佢進入國際市場，使用量與認受性提升後，升勢將會放緩同趨穩，不過未來五至七年仍處於上升周期，適合長期持有，投資者不妨等匯價升至6.7水平敍做一年或以上嘅定期，仲有得印印腳收吓息。
澳元0.72買入博彈
Kitty：商品價格咁唔掂，實影響澳元走勢，我早就取消咗去澳洲Working Holiday嘅計劃喇！
黃：係o架！商品價格弱勢，影響澳洲資源出口，拖累相關收益，但係國際貨幣基金組織（IMF）預期明年環球經濟勢好轉，意味有機會帶動商品價格回升，而且整體價格已跌得太殘，未來睇法唔使太悲觀。
澳洲目前貨幣政策已由寬鬆趨向中性，近期央行會議已未有再出現澳元匯價相對偏高嘅口脗，暗示現行匯率屬於適度水平，澳元兌美元近期於0.72有支持，並會出現小反彈，不過顧及美國有機會加息，而且商品價格未回升，所以暫時只係啱短炒，新手或非貼市人士就可考慮澳元直盤，0.72水平買入博反彈，上望0.75，係穩健之選。
新西蘭或減兩次息
黃：新西蘭今年突然減息令市場嘩然，預計未來仲有兩次減息機會，相信澳元反彈力度會較強，較貼市嘅進階投資者，中線可考慮買澳元沽紐元嘅交叉盤，早前曾見1.14水平，近期將維持喺1.08至1.14之間，博後市回升至1.2水平。
分注沽Yen 贏面9成
李：寶華世紀資本市場執行副總裁 李焜明
Kitty：我心血來潮想做吓淡友，有乜啱我沽？
李：首選梗係日圓啦！日本首相安倍晉三自一二年上任至今近三年，「安倍經濟學」嘅「三支箭」喺一三至一四年間顯著見效，主要是由於一一年發生「311大地震」拖低基數所致，然而目前已冇新意力挽狂瀾，日本受消費開支疲弱因素拖累，今年次季國內生產總值（GDP）按年萎縮1.6%，環比下降0.4%。顧及亞洲新興市場貨幣紛紛「插水」，馬元更曾創十七年新低，印尼盾以至南韓圜等亦無法獨善其身，若然日本唔貶值對撼，就對唔住自己喇！
年尾恐跌穿6算港元
李：日央行推低日圓嘅決心堅定，強美元嘅條件為日圓貶值錦上添花，預計年尾美元兌日圓可達130，即跌穿六算港元，買美元沽日圓有九成勝算，建議可以喺回落到122至123水平落首注、121與120水平再各添一注，喺127開始食胡，賺筆旅費去日本過一個白色聖誕！
加元半年內見1.35
彩兒：油價跌得咁甘，加元又點會有運行吖？
李：加拿大係主要原油出產國之一，當地生產商生產成本一般約60美元一桶，但面對目前只係約40美元嘅油價，真係做一桶、蝕一桶架！美國頁岩氣公司都不斷傳出執笠消息，另邊廂沙特阿拉伯產油公司成本只係需要10至15美元，究竟加國生產商可以燒銀紙幾耐？美元兌加元喺1.29嗰時，就見到已形成跌浪，未來六個月可見1.35水平。
另外值得留意嘅係，環球經濟除美國同英國情況好啲之外，其他國家都展現疲態，特別係中國經濟下行壓力，無疑拖累加國礦石原料出口，銅價更見六年低位。投資者不妨喺美元兌加元1.3水平開始買美元沽加元，再喺1.29及1.28分別加一注，其後喺加元跌至1.33水平再留意市況，並伺機平倉。
外匯嘅嘢你識幾多？
入門產品未涉孖展
Q：投資外匯一定涉及孖展，有機會畀追孖展電話追到瘦？
A：外匯投資嘅入門級產品，好似敍做定期存款同買賣實貨，都唔涉及孖展借貸，交易費主要係包含喺買賣差價當中，成熟市場貨幣嘅差價普遍係10點子內，新興國家貨幣差價就有機會係10點子以上。舉個例，歐元兌美元嘅買入價同賣出價分別係1.1050及1.1045，即差價就係5點子。
佔資產比稍高無妨
Q：初投資匯市，應佔資產比例幾多？
A：如果係低風險外幣產品，例如定期存款或者只買賣外匯實貨，由於均受最高50萬元存款保障計劃保障，所以較高佔比亦未為不可；但如果係槓桿式外匯投資，因涉及借貸與槓桿，佔比應以10%為上限，投資者應視乎個人風險承受能力而定。
匯價倘跌小心走位
Q：怎計外匯投資嘅利潤及虧損，乜情況會被追孖展？
A：外匯孖展係較常見嘅外匯投資，不過係屬於高風險投資，投資者需存入合約總值一定比率嘅保證金開倉，證監會規定槓桿倍數上限係20倍，按最低開倉要求計，保證金及維持按金分別係合約總值5%及3%。假設喺0.73水平買入10萬美元嘅澳元合約，需以5,000美元保證金開倉，喺澳元跌至0.7水平就會被追收孖展，跌至0.68水平就會輸光本金。
利潤及虧損方程式：指定外幣合約價值 x（平倉價-開倉價） x 合約數目 x港元兌美元匯率
幾倍槓桿小試牛刀
Q：新手初涉足槓桿式的外匯投資，點樣控制風險？
A：新手應以5至10倍槓桿小試牛刀，一旦睇錯市，仍有機會加注或即時止蝕，未至於即時被強制平倉、輸晒按金，須緊記槓桿式外匯投資係有被追收孖展（補倉）同輸掉本金嘅機會，投資者應做好風險管理，嚴守止蝕位。
若有料報畀彩兒同Kitty或有嘢問，可電郵money.biz@on.cc
Kitty、彩兒