有股評家朋友笑言近日推介股份給散戶，就如電話騙案一樣，由於市況惡劣命中率低，一旦股價下跌，人家以為你在呃佢錢。所以都係無謂壯烈犧牲，今日講講近期的市場觀察。
神劇「大時代」已經重播完差不多兩個月，但當中情節仍歷歷在目。其中一幕是五蟹集團上市，陳滔滔為女友報仇，決定追擊五蟹集團，方法是重複地一面沽貨質低五蟹股價，同時又在低價買回，而丁孝蟹想托價，不理價推股價向上，陳滔滔就趁機在高位沽貨，來來回回咁做，正如諸葛亮「草船借箭」一樣，賺丁蟹一家的錢。
近日A股表現令人想起這段情節，國家隊入市維穩，滬綜指上周升近4,000點時，中證監發言人表示市場已穩定下來，證金公司毋須再入市，之後投資者便一哄而散，爭相沽貨，滬綜指三兩個交易日便跌回至3,600點以下水平，其後國家隊又再現蹤影，滬綜指很快又回升至3,800點水平，之後的故事就好像陳滔滔不斷草船借箭一樣。
市場似乎已認定國家隊在3,600點以下會托市，4,000點附近會袖手旁觀，故希望在此區間不斷炒上落。如果有睇套劇，都知故事發展下去，陳滔滔輸到一毫字都冇。
話說當時市場氣氛熾熱，股價不理性上升，方展博已警告陳滔滔，不過佢冇理會，繼續大手買入五蟹股份，丁蟹則被高人陳萬賢「指點」，拋售餘下五蟹股權，大手沽期指，最終股災來臨賺4億元。
究竟A股投資者會否像陳滔滔一樣貪勝不知輸，而國家隊會否掉轉槍頭一齊「隊」呢？咁就要下回分解啦。
中國銀盛財富管理首席策略師 郭家耀（作者為註冊持牌人士）