Market Insight：睇數據當食定心丸

自從上周二中國迅雷不及掩耳來個突襲式匯率貶值，話就話一次性質，但去年十一月人行減息開始，經濟屢托無成效，七月再來一個股災，全年保七變得危危乎，將人仔貶值來個一石二鳥，將通縮與經濟問題一次過輸出要全世界幫手找數。

美國進口中國貨品貶值，意味通脹壓力大減，聯儲局或睇多一兩個月至加息絕對唔出奇。十年期美債息六月在2.5厘水平見頂後級級落，預告債商都睇美息中短期加幅有限。古勝大膽估計，在中國及新興市場匯率風暴，加埋大宗商品價插極唔見底下，今年美國加唔到息機會高過五成。

芬佬們沽之而後快

睇住個市認真唔開胃，基金經理依家當正港股跌過落天津爆炸個山埃水氹，掂吓都死，齊齊沽之而後快。昨日個市輕鬆跌穿七月八日股災低位22,836點，最後跌410點報22,757點，營做高低腳不成，反而破底直插。

股民都會想問，究竟後市個底喺邊度？毫無疑問，經歷滬港通、A股狂牛加埋憧憬中國大媽掃貨，三服興奮劑一齊用，港股好不容易先破到25,000點的海嘯後高位，去到28,588點。四月大時代持續在兩萬七、八，千幾兩千億成交引了大批生力軍落疊，恐怕今次唔係一年半載可以消化到高位驚人咁多的蟹貨，今年甚至明年返唔到28,588點，幾乎已成事實。

個市愈玩愈悲情，經已聽到有人講後市，會變成○七年翻版，當年直通車撻Q，恒指由31,958插到落10,676點，一插就唔見兩萬幾點。悲成咁，在下卻未敢苟同。樂觀去睇，當年港股高位24倍市盈率，今浪高位係12.5倍左右，跳樓比喻，照計今次天台離地面矮啲，當然，會有人話二樓跳落街都死得。

用○九年之後港股的全年高低波幅比較，今年恒指波幅行咗5,978點，已經多過一二至一四年的全年波幅，接近一○年6,017點水平，更甚是，會否重演一一年挾住希債危機，美、歐齊齊被調低信貸評級般，結果港股先高後低交出8,298點波幅？以此計算，低位會去到20,290點，相當於9.4倍市盈率，比過往十年歷史平均12.8倍折讓兩成六。

港股大冧機會較低

主觀認為，這機會應該低於三成。一來中國減息的刺激應該在第三、四季陸續浮現，由中國貶值，使美國有意再延遲加息的舉動看，港股現水平雖然未至於可以立即瞓身搏命，但再大跌的風險應該已經大減，早前能夠全身而退，以逸待勞的，未來兩個月可以酌量入番多少受惠國企改革的國企股，以及業務防守力強的中資電訊股。

講番個市，昨日13隻藍籌創52周低，煤、油等資源股外，澳門博彩收入每況愈下，兩隻濠賭股齊齊插水，金沙（01928）及銀娛（00027）跌3.6%及6%，走勢差過個市。老友過完大海返嚟，話暑假關係澳門仲係人頭湧湧，但大額賭廳卻有靜蠅蠅情況，反貪加埋A股股災之後，似乎去搏殺的內地客真係少咗咁話。

今年新一批博彩度假村陸續開幕，早排瑞銀報告話賭客減少關係，新開賭枱數目比預期少，似乎下半年競爭會更白熱化，撈底都係另作他選。

再講少少業績股，神州租車（00699）半年賺4.07億元人仔，按年升86.5%，每股盈利0.172元人仔，不派中期息。京信通信（02342）半年純利1.09億元，按年升50.4%，每股盈利5.91仙，派中期息1.5仙外，再十送一紅股，業績升幅勁主要係舊年盈利基數較低。

「東網money18」fb專頁搶先Like

古勝又有好介紹，「東網money18」facebook專頁已正式登場，內容包羅萬有，網友可即時分享財經資訊，助你輕鬆掌握投資亮點及趨勢，只要登入專頁給個「讚」，便可全程緊貼追蹤，與好友分享。

「東網money18」facebook專頁率先將黃國英、鄭家華及沈振盈等投資名家的文章全文上載，網友可先睹為快之外，分享及發表意見，甚至向名家留言。「學生擂台」更是不容錯過的環節，各大院校學生每周揀股比併炒技，「東網money18」 facebook專頁每天跟進股價變動，網友可即時了解各院校同學的揀股成績，更可留言給予意見。千祈咪錯過。

http://www.facebook.com/money18

古勝