絲絲講場：揭超級富豪絕密3招

攞專利權冇得偷橋

首先，做到最好……係唔夠嘅！要做市場上唯一嗰個，排除競爭。金融係好搵，但攞唔到專利，不停要度新嘢搞。科技就唔同，成果有得申請專利，對手冇得抄。當今世界首富係邊位？咪就係微軟創辦人蓋茨囉。

搵獨市生意免競爭

第二，搵個難開發嘅市場做獨市。乜唔係搵個勁大市場進軍埋全球先啱咩？Nope。人人衝住入嘅市場，過一段時間實要打減價戰，盤生意會愈嚟愈冇肉食。與其係咁，不如揀個細啲、但可以擸晒嚟做嘅Market。

例子？就睇電訊行，Vodafone同AT&T喺全球爭崩頭，係人都識，不過佢哋老細係咪全球最有錢先？又睇吓電訊大亨斯利姆，做過三年全球首富，就齋靠主打一個墨西哥。

揸知識產權最穩陣

第三，要有值錢資產揸手，可以係房地產，但最好係能源、技術，或者品牌呢類知識產權。

一句到尾，要做世上最有錢嗰1%嘅人，秘訣就係踢走競爭。難就梗嘅，從來冇話過易。來，畀啲大志出來。

余絲韻