北水頭等倉：中信現估值難動心

其實，目前A股所面對的不是流動性問題，而是投資者的信心問題。內地經濟增長持續放緩，多項穩增長措施已出台，但經濟仍未見有大起色，再加上A股大跌，股市融資功能停頓，再來個人民幣貶值，一來對刺激出口作用不大，卻觸發區內其他貨幣競相貶值。

航空股跌勢未止

此舉對外債甚高的中國企業而言亦是百上加斤，匯率貶值預期令市場平添一項重大不明朗因素。加上區內人禍不絕，呢個咁糟糕的局面，唔係靠中央意志可以應付得到。在看清楚前路前，做旁觀者係最自保。

航空股繼續彈完再散，昨日國航（00753）股價率先失守250日線。若果人民幣持續貶值的看法無錯，航空股實不宜持有。睇次季國航是三家中資航空股中股價最先見頂的一員，今次股價率先失守牛熊分界線，可能係預示板塊跌浪還在後頭，仍持有東航（00670）及南航（01055）的投資者，宜把握減持套現的機會。

繼續睇下防守性股份，上個月大跌市中信股份（00267）一度失守12元，上周曾反彈至15.28元，昨收報14.62元，跌1.4%。呢隻大型綜企股除了大股東係阿爺之外，其他海外策略股東來頭唔少，但目前要先整理與母公司的資產以及配合央企改革，總之長路漫漫，加上現價往績市盈率9倍，市帳率0.88倍，息率僅1厘多，估值唔見得吸引。

如果下周一公布的業績無咩特別，呢啲價即使睇長線亦難令投資者動心，且看第三季尾的魚缸Fall Sale有冇平貨執好過。

司慕渢