Market Insight：市場瀰漫悲觀情緒

自上周二人行突然讓人民幣出現一次過貶值，港股威過半日之後，之後冇段好睇，恒指由24,924點高位，輾轉殺到落昨日貼底收23,167點，再跌307點，幾日之間，又返回七月初股災低位附近。

要知投資最怕睇唔清楚前景，人行口講貶值只屬一次過，不過，區區3%貶值為乜，市場有唔同演繹角度，如果為應對萎縮中的外貿，相比起今年新興市場貨幣，在美國加息在即下，無不跌到七個一皮，兌美金閒閒哋貶值一至兩成。人民幣修正的幅度，就明顯唔多足夠。最怕是十月確認入到IMF的特別提款權（SDR），人行反口放軟手腳加入貨幣貶值戰。

本身內地企業盈利增長放緩情況未見底，A股估值唔平，外資輸價兼輸匯水就無謂。況且，今年歐洲放水無上限，美國踏入復甦坦途，歐美股市大把世界撈，跨國基金對中國投資意欲本來就唔高，整個暴力救市加埋貨幣貶值風險，就更加不屑一顧，攞錢走算數。

REITs回勇 領展獨弱

昨日見A股收市後，港股又一輪沽盤湧現，推到恒指創八個月收市新低，主板成交反而升至917億元，比前日多109億元，反映對魚缸死心的人愈來愈多。在情緒勝過理智下，七月股災低位22,836點要唔要再試試，睇嚟都係五五波。

因為要進軍內地，又早被內地一些公司搶先註冊，避免「撞名」，領匯屈就要改名領展（00823）。新名腳頭好唔好就未知，但個價落到一個月新低卻係鐵一般事實，昨跌0.5%收42.55元。話時話，近排人民幣貶值，債商無不視為中國開始向世界輸出通縮的安排。事實上，上星期人仔貶值消息一出，十年期美國國債一度跌至2.08厘，同七月初高位2.46厘比較，輾轉回落超過一成五。

美債被視為無風險利率指標，息率回落，刺激唔少穩定回報投資好似REITs回升，同期置富產託（00778）由七月股災低位7.33元升返上7.75元（期間最高見過8.62元），再睇同期越房（00405）、陽房（00435）及冠君（02778）唔係隻隻有置富彈咁多，但大致都有類似走勢，領展好明顯在自顧自「獨弱」。

單打獨鬥毫無優勢

古勝七月底講過，唔多睇好在內地商廈，因租值有見頂味道，內地收租股折讓擴大之際，領展用一個唔算平價錢，向瑞安房地產（00272）收購上海企業天地返嚟收租，俗語有云「猛虎不及地頭蟲」，領展當日因為港府賤賣資產，有重估價值先咁威，今日出海同其他地產商單打獨鬥，仲有冇優勢，捧場客自己睇實劇情發展。當日建議二揀一，都係睇番超人純本地屋苑商場的置富。

大堆業績出籠，早排出過盈警的奶粉股合生元（01112），上半年盈利倒退34.4%至2.05億元人仔，唔派息，股價隊5.4%收報13.22元，創52周新低。合生元上半年銷售收入跌10.3%，毛利率降至58.2%。市場上，比較估得淡的滙證預測全年賺4.11億元人仔，合生元算係僅僅做到估算的五成，不過就算達標，一五年PE都講緊係17.2倍，即使股價由四月高位大跌六成八，攞住呢份業績，似乎短期要炒番上去唔易。

查實近排，乳業股得隻輝山（06863）唔知乜葫蘆賣乜藥，不斷見大股東增持而逆流向上，其他可謂無隻精神，連雅士利（01230）簽意向書同第二大股東法國達能將成檔內地嬰幼兒奶粉生意多美滋接手買下，股價連一浸都谷唔起，大致睇到基金對成個行業前景睇得淡過白開水。

潤電靠低煤價幫補

個市唔得，業績得的要隊，估唔到業績好的都借好消息出貨而難逃一跌。華潤電力（00836）半年賺68.1億元，增長12.4%，每股盈利1.43元，派息10仙。上半年售電量7,171萬兆瓦時升8.5%，煤炭價卻按年跌19%，使燃料單位成本減少19.5%。

內地製造業死氣沉沉，下半年售電都唔會有起色，但煤價結構性調整，若果上網電價唔因為阿爺逼電企「回饋社會」，出現大過預期調整的話，全年業績賺117億至125億元，應該無走雞，8倍PE唔到，4.9厘息率，短期18至20元之間上落機會大。

古勝