以為A股有北大人打救，豈料愈幫愈忙，今次連人仔都掂埋，真係唔知最後點收科。不過，上周中信系炒到飛天，可見炒國企改革重組概念仍為市場短期焦點。
睇番上周五升幅榜頭五十位的南京熊貓電子（00553）股價就升7.4%至7.22元收市，成交增至2,395萬元配合升勢，既然國企重組有得炒，不妨望多兩眼。
熊貓電子現時主業包括研發、生產及銷售電子裝備、消費電子產品，以及提供電子製造服務，由於內地對電子裝備產品的需求日增，業務前景尚算穩建。
再睇近期業績，熊貓電子今年首季收入較去年同期上升10.3%至8.7億元人民幣，盈利則上升15.6%至3,171萬元人民幣，表現又算係幾唔錯。
集團為配合中央推動科研發展，已於上海張江高科技園區設立全資子公司上海熊貓機器人科技公司，主要從事機器人及智能製造系統裝備研發，未來相關業務若有進一步發展，可視為潛在利好因素。當然，短期股價能否炒上，仍要睇國企重組炒得有幾熱。
策略上，集團股價上周五初現突破，成功衝破近一個月橫行阻力7元關，下站目標睇8元，跌穿7元止蝕，值博率不俗。
帥哥