絲絲講場：湯文亮輸完又嚟賭過
「細價樓爆煲論」半年前一出，紀惠集團副主席兼行政總裁湯文亮人氣爆燈，可惜佢嘅預言唔應驗，尋晚出嚟做找數真漢子，喺灣仔福臨門擺咗九圍「細價樓不爆煲夜認輸宴」。不過湯文亮輸完又嚟賭過，尋日朝就已經喺自己網誌上再挑機，搵科達地產主席湯君明嚟多場牙骹戰，由尋日起計三個月為限，話樓價必跌。
細樓未爆煲 擺酒認輸
今次每席要1.88萬元，計埋酒水同貼士加加埋埋大約30萬元落樓。食乜？紅燒排翅、三十頭原隻吉品鮑咁囉。
開席時，湯文亮話輸都輸得開心，事關見到咁多朋友。絲絲在場亦見到美聯（01200）主席黃建業、摸王黎汝遠、嶺南大學經濟系教授何濼生、投資者蔡志忠同股神陸東等仲有好多位。
湯文亮尋晚話擺酒容易請客難，咁邊個有請又冇嚟到？有兩位，一位係林一鳴，湯文亮就因為挑機佢而搞出呢場認輸宴；另一位就係湯文亮尋日嘅新挑機對象湯君明。
湯君明被挑機懶得理
被挑機，咁湯君明點？湯君明一於懶理，佢話覺得湯文亮淨係針對細價樓，又冇充分理由支持，湯君明認為成個樓市牽涉住宅、工商舖、以至農地等咁多瓣，唔可以一竹篙打一船人，雖然佢並唔反對樓市會跌，但就話依家未係時候咁話。
有份飲呢餐認輸宴嘅又點睇？蔡志忠話唔太睇淡後市，仲話細價樓唔會跌，永遠都好多人要買。而黎汝遠就話貴租撐住樓市，所以樓價難跌。睇嚟，湯文亮今次又係以寡敵眾喎。
余絲韻