絲絲講場：恒生人仔專家跳槽
恒生銀行（00011）又走多個人民幣專家，就係經濟研究及人民幣業務發展部主管顏劍文（文哥），會喺八月底離任。文哥係繼恒生中國副行長潘漢生之後，今年第二個走嘅恒生人仔專家。
去慣各大人仔論壇嘅，實認得文哥前面嗰撮型仔銀髮，Highlight都未必有咁效果。
文哥即將結束廿載恒生職業生涯，不過市傳佢會繼續留喺財資界打滾。佢喺恒生唔單止為離岸人民幣市場發展出謀獻策咁簡單，以往兩度出任恒生中國資金部主管，即係人民幣匯改之前，文哥就已經返中國幫恒生「開荒」，可謂睇住人民幣發展同走出去。
Trader出身又熟經濟
近年中港人民幣新政策密密出台，同時熟悉兩地銀行同貨幣運作，即係Banker界形容「摺高衫袖落手做」嘅實務專家都好搶手，要搵個好似文哥咁又係交易員（Trader）出身，又熟經濟理論嘅人民幣「生招牌」，相信唔容易。
余絲韻