絲絲講場：高薪兼高興 十大筍工
想打份開心工，但又怕開心唔飽肚？想打份賺得多錢嘅工，但又怕唔開心？呢個集哲學同心理加埋經濟嘅思辯，竟然係有答案！既開心又多金嘅工，原來呢個世界上係存在嘅。美國有個做咗兩年嘅調查，就列出咗最開心又最多金嘅十份工添。
做「阿二」仲爽
個調查係美國一個求職網站CareerBliss.com搞出嚟，佢哋喺一三年至一五年間問咗超過二萬五千間美國公司嘅打工仔。原來佢哋按10個因素嚟評定Happy指數，包括同上司嘅關係、與同事嘅關係、Office環境等。
結果呢，最開心又最多金嘅第一位係全球銷售副總裁呢個Post，Happy指數係爆燈嘅5分，年薪中位數係16.3萬美元，足足係美國人工中位數嘅三倍。再睇，十大當中，有四個係副總裁位，睇嚟唔一定做到部門阿頭揸旗先開心，做阿二都一樣好Happy。點解？枝旗有幾重，你懂的。
鄒金根年薪升級
絲絲醒起，小米位副總裁「虎哥」Hugo Barra，咪正正係睇晒中國以外嘅全球營運，咪即是至開心又多金嘅筍工第二位。
本地代表都有一個，就係數碼通（00315）鄒金根（Stephen），佢呢個月嘅Post係科技總裁，咪即是開心多金筍工榜上嘅第三位。Stephen九月就會暫代總裁一職，年薪會升級到594萬添！
余絲韻