Market Insight：收租股風光不再

期指結算日，講古佬或者講到天花龍鳳，大戶對撼，但實際上，港股場面唔單只水盡鵝飛，看期指未平倉合約，自四月大時代後愈玩愈縮，到近期，基金經理見北京托市托到唔湯唔水，A股後向極不明朗，炒家對七轉八月合約表現得相當唔積極。加埋現貨成交疏落，成個市的短線起落，變得更加無定向風，昨日A股尾市冧山泥一樣，結果拖埋港股後腿，恒指跌121點收場，報24,497點。

發盈喜的國壽（02628），係威係勢早市開30.3元，上半年保險公司投資收益大增，惟在A股股災之後，恐怕再難維持。國壽盈喜結果成為大戶派貨良機，昨日浸浸落最後貼住全日低位收28.9元，跌2.5%，成功爭取成為最差表現藍籌。

為保七焗住變招

由包尾數上嚟第二係中國神華（01088），皆因煤炭價跌到十年低，上半年業績快報預告，純利跌四成二至130.68億元人仔，若攞第二季同首季比較，神華業績持平，但對比大行預期的按季出現改善，神華仲係差過街外預期，即使估值夠低，但煤炭業仲未見到黑暗盡頭，無故事好炒下，都係先沽而後快。

中國經濟遲遲無起色，年終保唔保到七，家陣睇嚟仲係五五波。一場股災，近排唔少大行口淡淡紛紛調低國企股下半年業績展望，形成國指比恒指表現更弱的慘況。古勝不只一次提過，中國純粹透過減息降準，對出口製造業主導的經濟證明刺激作用極為有限，近排發改委已經發功，投資項目逢審必批，推大量基礎建設托經濟，增加GDP裏面投資比重，但要中國經濟真正出現好轉，歸根究柢要讓人仔貶值，先有得救機會。

內地豪客減來港

中國恨人民幣能夠加入國際儲備貨幣，已經恨到流晒口水。五年前向IMF申請加入到特別提款權（SDR），得定唔得於十月便有分曉，亦因為咁，今年人仔匯率猶如被點穴大師施功一樣，郁都唔郁。就係怕最後關頭添煩添亂，就算出口製造業死到直一直，都由得佢自生自滅，國家任務大於一切。

IMF昨放風，話A股股災同暴力托市，唔會影響加唔加入到特別提款權（SDR）的決定，照咁情況，人仔死都頂埋最後三兩個月，要賭匯率轉角市救經濟，似乎最快九至十月期間，先有機會。

恒隆地產（00101）出業績，上半年純利28.41億元，按年跌11.6%，撇除物業重估收益，純利24.4億元，按年跌1.4%，股價昨微升0.2%報22.05元。隨住恒隆嫌貴不在港投地建屋，手上貨尾又賣少見少，愈來愈似一隻中港收租股，3.4厘周息率，有點食之無味棄之可惜的味道。

內地反貪，送禮文化不再，豪客客源減少，再者落嚟香港落得多都悶，唔少高消費內地客近年轉戰匯水有着數的日、韓，甚至歐洲購物。本地專攻豪客生意零售市道，一下子入咗雪櫃一樣。行過遊客區，非一線舖位的珠寶鐘錶固然拍烏蠅，就連廣東道尚有人龍的國際品牌名店，近日都以關舖威脅業主減租。

收息計寧取REITs

過往經驗，尤其一線商場，即使沙士都唔見減租，事關排隊進駐品牌多，唔憂無客。不過，過去十年租金漲幅實在驚人，廣東道大型舖位閒閒哋月租八位數，若非跨國大品牌或者金舖，實無乜生意做到呢條數，今次真係要睇業主同租客邊個手瓜硬啲。

股市反應永遠快人一步，九倉（00004）股價早於一三年見頂，至今由高位跌掉三分一。三隻老牌收租股九倉、希慎（00014）同鷹君（00041），市帳率分別為0.51、0.53及0.36倍，比十年平均的0.84、0.74及0.44倍低一截。折讓反映資產重估年年漲的趨勢告終，也預視租金見頂的風險。三股息率介乎2.7至3.8厘，要收息過活，諗番幾隻物業組合，少啲遊客區街舖的REITs，好似置富產託（00778）或領匯（00823）好過。

古勝