絲絲講場：中電信教防假小三真騙子
騙徒要呃人，「猜猜我是誰」唔興喇，依家興打電話自稱係「中聯辦」或者乜乜快遞，今個七月就呃走咗香港人8千幾萬。與其笑人，不如睇多啲新招保護吓自己。中國電信（00728）最近喺微博整咗個溫馨提示，講吓今年上半年至Hit嘅電話短訊騙招。
「我係你老公嘅女朋友，我要同佢結婚，呢度有我同佢嘅相，唔信，你自己開嚟睇」，做人老婆收到呢啲挑機短訊，仲唔嬲到震即刻Click入去，恭喜你，咁就即刻中招，一Click即刻中木馬病毒。
扮銀行換積分呃人
騙徒除咗扮小三，仲會扮係你Friend，叫你Click入去條Link睇張團體相，咁又得咗。仲有扮銀行同商戶話同你兌換積分，甚至索性扮係網購退款呃你銀行戶口密碼同驗證碼。
絲絲最估唔到嘅係，騙徒睇中為人父母緊張仔女成績，就扮老師呃你可以早啲睇到張成績表。呢招果然新。
余絲韻