絲絲講場：卡賓先生「衣」然搶鏡
好多時裝品牌都會搵代言人，但內地男裝公司卡賓（02030）完全唔使，事關佢哋主席楊紫明不單止係公司創辦人兼首席設計師，仲係公司嘅「生招牌」，有個朵叫「卡賓先生」。卡賓先生每次出場嘅戰衣，總係令人眼前亮一亮，旁人完全失晒色。
尋日卡賓先生身上嘅一套戰衣，當然亦係佢嘅精心設計，係佢一年前嘅作品，條褲係新推嘅運動系列，識揀就梗係揀件恤衫，嗱，大家有福了，件恤衫市面已經有得賣。卡賓先生仲話，明年嘅作品會充滿嘉年華同運動元素。
半年多賺31%
冇番咁上下Fit，又點擔得起啲超凡嘅Design？所以運動一定唔少得。嗱，卡賓先生以前就係位拳擊手，仲攞過省比賽季軍，佢仲好鍾意跑步同賽車，近期仲跑咗渣打全馬添。
差啲唔記得講，卡賓截至今年六月底止六個月錄得盈利約1.49億元人民幣（下同），按年增長31.88%；每股盈利20.98分，派息10.5港仙。
余絲韻