孖妹S檔案：金融小花財「姿」鬥一番

蔡雪瑩　分散風險兼收息

蔡：新鴻基尊尚資本管理助理副總裁　蔡雪瑩（Snowy）

Kitty：你就好啦，去咗私銀做嘢，隨時都可以向身邊「高人」取經。之前有冇趁低入市先？

蔡：跌市時撈咗啲A股ETF（交易所買賣基金），但其實我嘅股票投資唔多。不如就講吓我個「無敵組合」啦！個組合分開兩部分，會用每月人工買入股票基金同十年期儲蓄保險，另外已有資產就係同媽咪夾份嘅，買入人民幣債券同股票，主要買優質藍籌股收息。呢個組合喺過去三年，每年都增長10至12%。

我覺得投資最緊要有個全面嘅組合，咁先唔會受市場波動過分影響。

彩兒：樣樣都有，好明顯係想分散風險啦。講到買股收息，內銀股應該都走唔甩！

蔡雪瑩	蔡雪瑩	蔡雪瑩 「無敵組合」配置

最初入市靠媽咪

蔡：冇錯，我第一隻買嘅就係建行（00939），不過係由媽咪呢位「師奶股神」揸Fit買入，哈哈。佢大約五年前退休，讀咗個投資課程後開始買股票。成為師奶股神？當然未至於好勁，但見佢投資回報都平穩增長，我自己又冇時間睇，咪畀咗3萬蚊佢幫我投資囉。隻股票到依家都未沽（口架）。

個人投資多數都係同媽咪一齊研究，以前做主播時，亦有向同事、行家偷師。依家入咗金融界，多咗機會接觸投資，所以開始慢慢轉由自己管理番。而且投資心態上都唔同咗，因為明白到投資可以令資產增值，所以依家寧願拎啲錢去投資，覺得消費唔抵。

Kitty：原來背後有「股神」教路，難怪投資組合咁穩健，話唔定你已經坐擁百萬身家喇。

蔡：我仲未儲到咁多錢喎……都係努力搵錢、專心拚搏先啦，希望短期內可以儲到。而我嘅十年計劃係希望到時已經有自己嘅物業同家庭。

周嘉儀　買藍籌揸中長線

周：興業證券（香港）市場拓展部聯席董事　周嘉儀（Venus）

Kitty：由新聞轉行做證券，每日對住咁多「冧巴」，有咩感覺？

周：我一向有留意財經資訊，自己亦有買開股票，第一次買股經驗係抽新股。○六、○七年嘅新股熱潮好厲害，幾乎每星期都有新股上市，而且好少潛水，所以自己成日揀啲Hit嘅嚟抽，每次分到一、兩手啦。啱啱出嚟做嘢一段時間，抽IPO賺幾百、一千已經好開心，會拎嚟買吓衫同鞋，剩番嘅就儲起佢。

儲蓄習慣係父母教落嘅，要有筆錢以備不時之需。初出嚟做嘢，即使人工唔多，得萬一、二蚊，都會規定自己每個月儲起最少3,000蚊，積少成多，幾年後已經儲到筆唔錯嘅金額。我都幾欣賞自己可以嚴守呢個儲蓄習慣。

彩兒：聽聞你嘅私己已經滾大至以百萬元計，幾年前仲同家姐一齊買樓做業主，厲害！

周嘉儀	周嘉儀	周嘉儀 個人資產配置

做功課衡量風險

周：要再努力啲搵錢，希望日後有機會買入第二個物業啦。股票投資方面，我只會買正股，因為易啲掌握，其他衍生工具暫時唔會沾手。目前手持5隻股票都係高息穩健型藍籌，做中長線投資，最少會揸三年，所以之前跌市雖然有少許帳面損失，但都冇做任何交易。

投資最緊要做足功課，以及衡量個人可承受風險，只要隻股基本面好，跌咗都可以守。

Kitty：你五月底剛讀完EMBA（高級管理人員工商管理碩士），嚟緊又要考證券經紀牌。邊有時間去搵Mr. Right？

周：其實喺金融界我都仲係新人，好多嘢要學，會繼續專注Marketing工作。公司遲啲會做埋保險業務，所以有時間我都想考埋個保險牌。其實學多啲嘢，一定係有好冇壞。

彩兒：哇，果然係女強人，咁快又Set咗個新目標畀自己喇。加油！

方健儀	方健儀	方健儀 個人資產配置

方健儀　淡淡定「磚頭」保值

方：電視台前首席記者兼新聞主播　方健儀（Akina）

Kitty：「淡定姐」，前兩日我喺書展見到你呀。你幫朋友間日本物業投資公司做代言喎，唔通想進軍投資界？

方：幫朋友啫。冇咁嘅打算，因為自己對投資唔熟悉，費事誤導人啦，哈哈。其實我係明燈嚟（口架），試過買股票同外匯，買乜跌乜。之前見歐元兌港元跌到9.7，以為係低位啦，點知依家得番8個幾。買股票都唔係好啱我，唔好睇我外表咁淡定，其實我好緊張，買咗股票會成日Check價。我第一隻買嘅股票，都係阿爸當年幫我抽嘅港鐵（00066）新股，得一手咋，冇理過佢。擺咗咁多年，我諗點都有賺嘅。

個人資產都係以銀行儲蓄為主，大約佔四成。我係個好傳統嘅人，如果生活喺以前，應該係個用罐儲起私己錢嘅「婆仔」。唯獨最近對定期存款同iBond有啲心動，因為好似比較穩陣。

儲半份糧做首期

彩兒：放喺銀行咁低息你都制，睇嚟你對投資真係冇乜興趣喎。咦，咁其餘嗰六成係咩嚟（口架）？

方：層樓囉，都係買「磚頭」實在啲。不過唔係為投資，只係自住。我哋兩公婆喺一○年買，做八成半按揭，供款期廿五年。份首期係靠自己儲（口架），以前讀書已經好慳，出來做嘢每月最少儲一半人工做「買樓基金」，足足儲咗十年。好彩嘅係，之前一直同父母住，佢哋又有工作，家庭負擔唔大，客觀條件容許我儲到咁多。其實我覺得父母幫手畀首期唔係問題，最緊要係計過自己負擔到之後嘅供款。

依家以自由身工作，收入冇咁穩定，個人理財更難掌握，不過都仲儲到錢嘅。嚟緊目標係想提早供斷層樓，然後買間大啲嘅屋，因為屋企有太多嘢喇。

Kitty：你筆私己一定好大份。

方：私己錢呢家嘢，當然唔會話畀人知有幾多，哈哈哈。

髮型：Vincent Yeung@RVsStyling

化妝：Katherine Lo

飾物：Diana Law Printed Accessories

Kitty　彩兒