Market Insight：雅士利隨時有後着

港股成交奀成咁，加埋聯儲局本周議息，睇怕未來兩日飲多幾杯咖啡先可以免被魚缸催眠。聯儲局主席耶倫唔只一次喺公開場合預告今年啟動加息機會極高，唔少華爾街專家認為，在低通脹及經濟增長復甦力度未算十分強勁，美國今明兩年加息空間實有限，今年大有「為加而加」味道，九至十二月之間加一次，純為滿足市場預期。

隨住首加之日子逼近，理論上定息投資壓力會加大，但偏偏逆線行車的債商實在唔少。十年期美債息在六、七月連番挑戰2.5厘水平未果，近日輾轉落返去2.2至2.3厘水平，反映債商身體力行，用真金白銀賭聯儲局加息有機會係有頭威無尾陣，加一次之後無以為繼。

資金流向帶出啟示

美銀美林資金流報告亦反映出這趨勢，截至上周四前一個星期環球債券基金錄得55億美元淨流入，創三個月最高紀錄，資金主要由新興市場撤出，上周錄得33億美元淨流出，兩星期累計走資達100億美元；黃金淨流出11億美元，看來賭美元升、油金與貴金屬續跌是短期相對明朗，有路可跟的投資趨勢。

美股正值業績期，在蘋果公司、IBM、麥當勞到3M等，成績表全部差過市場預期，上周道指四連陰，周五跌163點收17,568點，同周一高位18,137點一比，完全由頭沽到落尾。上周五本港夜期穿兩萬五，新加坡場外莊家開價貼近24,920點，睇怕今日早市都係凶多吉少。

嗰頭講緊內地可能將獨生二孩修訂到全面放寬兩孩政策，滿以為奶粉股會有一陣好日子過，點知基金愛股合生元（01112）發盈警，話中期業績要跌三成六，主因促銷活動令毛利率受壓所致。據聞有分析員早排見公司高管，完全察覺唔到有事，故市場對盈警反應好大，周五一隊就兩成一跌幅。美銀美林話，相信五、六月的業績表現相當差勁，盈利要跌八成五至可以衰到拖累半年業績交到盈警跌幅，畀17.5元目標話跑輸大市。

有望藉收購做一哥

另一邊廂，蒙牛（02319）旗下的雅士利（01230）獲第二大股東法國達能注資，注入多美滋中國，即旗下嬰兒奶粉業務，涉及資金又會用番嚟認購蒙牛股份。由於收購細節尚待披露，估計要到年底先完成交易。

從已知數據睇，達能在中國嬰兒配方奶粉市場佔有率近一成，穩坐第二把交椅，僅次於美贊臣，經過收購，雅士利有機會一躍成為一哥。但吊詭係，唔趁注資增持雅士利卻用來增持蒙牛，到底係想藉此減持內地市場競爭愈來愈激烈的奶粉業務，抑或另有原因。當然，技術上雅士利兩大股東加起已經持股七成五，再發股會踩過界。姑勿論點，暫時睇唔通，有待更多詳情公布。

另一感覺怪怪的交易，係領匯（00823）出價66億元人仔，買入瑞安房地產（00272）的上海企業天地一、二期收租業務，估值溢價大約2.4%。現時該項目每月收租2,460萬元人仔，高盛估計及停車場及管理費等收入，項目回報大約5.2%，項目扣除開支後，估計初期的淨營運收入回報率約介乎4.1至4.2%。

領匯北上為勢所逼

先唔講上海商用物業租值，短期會唔會見咗頂，買咗貴貨，事關磚頭周期，中港都差不多，就算今日在本地收購商場商廈，一樣會有同樣質疑。古勝感覺唔多好乃係今日內地發展商或租金收入較高的地產商，都有相當大折讓，像今次賣家瑞房，股價就比每股帳面值4.725元人仔折讓六成三，顯示股票市場對行業前景、穩定性、匯價甚至管治的風險溢價考量。

家陣領匯無打折不特止，仲輕微溢價入貨，計死數，項目淨回報高過領匯派送厘數些少，帳面數應有即時好處。但領匯最大賣點係房委會當年大幅低估注入去資產的升值潛力，而唔係買新項目，甚至跨境投資的能力溢價。今次買到返大陸，多少畀芬佬睇到，無地產母公司背景的領匯，在擴大本地投資組合無乜計的事實。

古勝