絲絲講場：Taylor借力京東剷山寨
美國鄉謠天后Taylor Swift紅爆內地，帶挈唔少山寨貨攬枕甚至N個簽名結他大賣。與其益人，Taylor決定推出官方產品，頭炮係400幾蚊港紙嘅潮Tee，嚟緊八月喺京東同埋阿里旗下天貓有得賣，九月仲會喺京東獨家推出自家女裝，價錢大約800至900蚊港紙。
獨家賣女裝Line
人家畀得個場你賣官方正品，就自然要幫你掃走晒啲山寨嘢，呢招借力打力，高。
Taylor早就向阿里同京東投訴山寨貨，今次Taylor條獨家女裝Line之所以揀京東，就因為天后覺得京東回應佢投訴夠積極。Taylor亦有搵律師跟進商標問題，原來依家內地有9個商標以佢個名註冊，有3個唔關佢本人事。
不過，睇怕Taylor未必知，籃球巨星米高佐敦幾年前都告過間體育用品公司侵犯「喬丹」商標，點知內地法院話美國大把人叫Jordan喎。山寨大國絕唔係浪得虛名。