絲絲講場：借錢睇讀書成績 大鱷勁Buy
人生同個「借」字分唔開。未上車無做樓按、炒股無做孖展，「借」字唔關你事？少至稅貸、私人財務都係借，絲絲就唔信你連碌卡都冇。平時借錢係睇月入、有冇樓揸手同埋信貸紀錄，但未來借貸市場新趨勢係，要睇埋你讀書時張成績表。
數據評估還款能力
話說，由一班Google前數據科學家搞出嚟嘅美國網上借貸平台Upstart，就要求申請者講明讀過邊間學校、讀邊科、公開試考成點、連大學學分（GPA）都要知，用嚟評估申請人嘅搵錢潛力。
咪以為名校畢業或者讀到博士實有着數，創辦人Dave Girouard話會睇埋行業人手需求同前景。話之你哈佛畢業、做梗律師定乜，分分鐘唔夠唔愁無工開嘅護士可以借咁多。呢條橋連著名對沖基金經理洛布都Buy，今個月先大手注資咗2.73億元。
咁本地薑又點睇？本港網上借貸平台WeLand.hk個CEO龍沛智（Simon）話「都有用嘅」。Simon話內地業務嚟講，申請人出身好嘅學校，還款紀錄都會好啲；至於喺香港，申請人若肯向佢哋交出學歷或者社交媒體嘅資料，仲會有利息優惠添。
傳統財仔：條橋唔work
不過傳統借貸業就似乎唔多Buy，第一信用（08215）主席冼國林直頭話Upstart呢招係無用兼多餘。佢仲話，私隱專員公署實會反對添。
其實，就算張成績表幫到手，借得多，到時咪還得多。話時話，張成績表究竟放咗喺邊度？