Market Insight：成交萎縮無得發圍

美股業績期表現反覆，重頭戲蘋果公司季績，iPhone銷售數字麻麻，股價在場外電子交易時段急挫，拖累之下，連日成交唔多夠、乾挾淡倉的港股，亦終於頂唔住，恒指尋日埋單跌253點，收報25,282點，國指亦跌137點，收11,734點，主板成交817億元固然好奀，期指也只得4.5萬張交投，成個市買賣兩閒咁款。

個市彈完之後轉靜，多多少少係拜祖國笨拙救市所致，救市初期打開口牌，話券商官股要等滬綜指升返上4,500點先准出貨，等同在A股頭上加個金剛圈，再升空間自然被扼殺，除非官方盡快澄清官股之去留，甚至豁出去，阿爺拍個心口，硬食全部官股唔出街，否則怯於中證金及券商手上過萬億元人仔官股，仲邊有人傻到掃上去畀國家隊食胡？A股在四千點左右，點穴等待阿爺發落，可以想像港A股及國企股，短期都好難會有運行。

電訊股仍未炒完

雖有上客數字亮麗，兼有鐵塔公司籌組上市消息，惟三隻內地電訊股都係威得一日，尋日統統腳軟，反映炒故事資金進出之快。不過，中移（00941）及中電信（00728）撈底入市資金唔少，鐵塔公司消息相信亦未有耐炒完，可等待繼續發酵。

講番蘋果公司第三季度業績，錄得純利107億美元，按年勁升三成八，營業額亦升三成三，去到496億美元，其實兩組數字都稍高於分析員預測，但股價績前跌1%，績後再插7%，市值眨吓眼唔見咗660億美元（約5,148億港元），等同三分一間騰訊（00700）咁滯。誇成咁，有分析歸咎於上季賣得4,750萬部iPhone，及唔上大行預測的4,880萬部。

代工股難逃一跌

唔少人都知iPhone多數揀九月才出新機，形成第三季換款前，去貨一般較慢。回顧一二至一四年的數據，第三季銷售往往只及第一季的65至70.3%，今年第三季賣4,750萬部，等於首季7,447萬的63.8%，係就係低咗些少，但歸根究底，回帶睇果迷餓大屏幕機餓得耐，iPhone 6首季銷售破盡紀錄，賣7,450萬部，比一四年首季勁升近46%，基數大之下，第三季出現偏差都不至於被沽得走晒樣，尤其季度業績中，iMac之銷售及現金淨值增長之表現，均令大行相當滿意。

相對於iPhone銷售不及預期，作為果迷，在下認為其實Apple Watch唔公布獨立銷售數字，先至係呢份季績的致命傷。四月開賣的Apple Watch，連iPod都不如，被撥入其他產品類別，似乎蘋果公司係有心淡化外界對Apple Watch銷售的質疑。分析員估實質賣得120萬至190萬隻，比預期的350萬至400萬低一大截，如果實屬，這條新戰線真係危危乎。可穿戴電子設備市場，繼Google glass高估市場潛力之後，蘋果公司可能都遭逢相同滑鐵盧之命運。難怪尋日代工股全線插水，瑞聲科技（02018）最傷跌6.8%，富智康（02038）跌3.9%，舜宇光學（02382）跌3.4%，相關股份恐怕短期要避一避。

中廣核電啱短炒

另外，唔少中資基金重倉的中廣核電力（01816），早排在班水救國的大潮中，股價由5.53元插到落2.9元，這隻長期有母企注資概念可炒的內地核電營運商一哥，尋日有單負面新聞，話說計劃明年上半年啟用的台山核電廠，兩組核電機組用法國國營核電設備商AREVA產品，被英國媒體指其設計可能有嚴重安全問題。

不過，尋日壞消息下，該股股價出奇咁硬淨，跌2.1%收3.7元，唔肯穿10日線3.65元，似多得早輪洗倉洗過龍所致。其實國務院已表明一四至二○年間，內地核電複合式年增長要達一成九，有國家硬目標撐住，如果守得住支持跌唔穿的話，短炒應該有得諗吓。