絲絲講場：日本人太有禮累經濟？

日本人待客出晒名細緻。去百貨公司搭電梯，掣都唔使自己篤，有靚靚制服小姐效勞；喺溫泉旅館歎完兩日離開時，有成排職員整齊企喺門口鞠躬送別。不過，做到令顧客咁賓至如歸，其實花咗好多時間同精力，估唔到，就係咁，搞到日本生產力喺Ｇ７（七大工業國）包尾。

經合組織（OECD）以每小時工作嘅經濟產值，嚟衡量Ｇ７嘅生產力，結果發現日本舊年生產力係四十一點五美元，反而其他Ｇ７國家全部都超過五十美元，美國仲以六十七點四美元稱霸添。

日本首相安倍晉三幾咁想喺二○二○年前，將日本服務業生產力提升多一倍，提倡引入科技嚟省番啲人力。但係當地似乎唔多受，事關佢哋傳統嘅待客文化根深柢固，想改？有啲難囉。

不過，唔係所有嘢都可以用金錢衡量嘅，好似有位喺東京三越百貨做咗三十五年嘅老臣子，專責喺門口迎送客人，佢可以認得出超過三百個熟客，佢話寧願要顧客一句「多謝」多過要錢。

難怪，日本遊客量自二○一三年以來急升咗倍，計番條數可能「有賺」呢。

余絲韻