絲絲講場：大鱷互片搵耶倫過橋

艾肯「維權」寸貝萊德

艾肯今次係喺一個基金界論壇上發炮，仲係瞄準同場嘅貝萊德CEO芬克嚟開火。論壇開場，佢兩位先嚟互讚吓對方，即係泰拳開場前拳手都要互攬吓咁。

話口未完，艾肯就嚟個直拳：「貝萊德係間極度危險嘅公司！」又話唔係針對芬克個人喎。

艾肯話貝萊德發行嗰啲ETF（交易所買賣基金），唔單止炒起咗啲高風險債券，佢哋仲揸咁重貨，萬一冧市，佢哋掟貨，邊個托得住個市？ETF依家已經太貴，流動性又極低，遲早爆煲咁話。

芬克反指逼回購累經濟

台下聽眾睇到咁，梗係全場笑住食花生。艾肯愈講愈High，話依家個市好似成班飲醉嘅債券投資者喺架大巴上面開P開到High晒，唔知架大巴就嚟衝落懸崖。艾肯仲騎騎笑問台下聽眾「知唔知邊個揸車？咪就係芬克同耶倫（聯儲局主席）囉。架車結果點撞毀？咪撞落舊黑色嘅石度囉」（Black Rock，即係貝萊德）

芬克好明顯辣着咗，反駁話ETF令市場更加透明，仲兜口兜面話：「Carl（艾肯），你投資就叻，不過你今次又錯，仲錯到無倫！」芬克仲話，啲維權股東逼到啲企業要回購愈嚟愈多股份，有錢唔去投資，分分鐘拖低經濟咁話。

針鋒相對成咁，有仇？話說幾個月前芬克發咗封公開信，呼籲啲企業阿頭要企硬睇長線，封信畀人話係向啲維權股東挑機。艾肯今次仲唔係還拖！

余絲韻