港股散水，證券從業員跳槽潮亦宣布正式玩完。由於券商暫時都睇唔通個市，唔敢貿貿然開新業務，打工仔被迫坐定定，更擔心有證券行老闆趁機抽水，花紅大縮水。
早幾個月前中港股市狂牛，證券行紛紛出現跳槽潮，傳有大行挖角閒閒哋月薪10萬，仲至少有9個月花紅！行內當時風光到，話起碼要加薪四成先跳槽。
依家？股佬個個話港股起碼要牛皮幾個月，至有得再玩。港股前景咁，證券行老闆梗係睇定啲先，唔擴充唔搞新嘢，跳槽潮立即靜晒。
依家？股佬個個話港股起碼要牛皮幾個月，至有得再玩。港股前景咁，證券行老闆梗係睇定啲先，唔擴充唔搞新嘢，跳槽潮立即靜晒。
有證券行老友同絲絲講，之前好市時遞信跳槽班從業員，有啲好彩走得快，過咗檔個股市至跌；但一啲成五月尾、六月先辭職，未返新工已經大冧市，不過行內比較少「放人飛機」，最多係驚吓啫。
證券行打工仔仲好擔心花紅大縮水。事關港股大時代時期嘅花紅，現時仍未落袋，皆因大時代係由四月八日開始，好多行一般嗰陣時剛已發咗上年度花紅，而嗰筆花紅又未反映之後嘅中港狂牛。殊不知，狂牛話咁快玩完，咁啲花紅呢？
余絲韻