俄羅斯人超Like電動車Tesla，當地啲財金猛人視之為「有轆嘅iPhone」，係有錢兼型仔嘅象徵。連Tesla老闆馬斯克喺當地嘅非官方社交網頁，都有超過10萬人Follow！但大大個俄羅斯市場喺面前，馬斯克都不為所動。有錢唔想賺？可能係唔敢。
當地嘅Tesla捧場客幾有來頭？英超球會車路士阿布拉莫域、俄羅斯經濟發展及貿易前部長格列夫、俄羅斯第三大銀行Gazprombank嘅阿頭Andrei Akimov、幫當地首富奧斯曼諾夫打理資產嗰位Streshinskiy咁啦。
搞到普通啲嘅科技才俊，都唔要自己架BMW X6，係都要換部Tesla S，俄羅斯買唔到咩？就出雙倍錢喺美國買完運返去。當地連Tesla嘅Fans Club都有，仲寫過幾次信畀Tesla，幾乎「跪求」Tesla駕臨俄羅斯。啲忠粉話Tesla喺俄羅斯一定掂，叫Tesla唔好淨係顧住中國市場咁話喎。結果，Tesla都係嗰句：俄羅斯市場「唔搞住」。
有錢唔想賺？係唔敢賺。舊年因烏克蘭問題，美俄關係跌到落谷底；仲有，馬斯克另一檔搞太空航行嘅SpaceX，早兩個月先啱啱攞到美國空軍批准可以進行軍事發射任務。咁敏感時刻，小心啲好。
俄羅斯Fans真係等唔切？最近莫斯科嘅Tesla服務中心就喺芬蘭，900公里啫，就睇你有幾愛。
余絲韻