絲絲講場：麥樸思邊肯咁快退休
鄧普頓新興市場團隊執行主席麥樸思（Mark Mobius）有「新興市場之父」稱號，簡直係新興市場嘅Icon，即是你見到喬布斯就會諗起蘋果嗰隻。尋日朝忽然有傳佢退休，市場中人震撼到呢。點知官方澄清，話麥樸思只係退任公司旗下一隻基金嘅首席投資經理，只係一隻咁多。
一基金交棒惹誤會
鄧普頓發言人解釋，麥樸思今次辭任，只涉及呢隻「鄧普頓新興市場基金」，基金喺倫敦上市，規模大概19億英鎊。接手嘅會係另一基金經理哈登貝格（Carlos Hardenberg），十月生效。不過，麥樸思只係唔做「首席」，仍會「傍」住同哈登貝格一齊睇住隻基金咁話。
麥樸思有幾乎半世紀嘅新興市場投資經驗，佢早喺一九八七年加入鄧普頓，當時都仲未有人去留意新興市場，至今佢管理基金規模已經去到400億美元。佢近年仲好關心A股，講親嘢都有指標性。
至於接佢嗰一隻基金手嘅哈登貝格，亦喺金融界打滾咗16年，○二年加盟鄧普頓，係公司前緣市場團隊嘅骨幹。前緣市場係乜？即係仲落後過新興市場，風險再高嗰啲，即是土耳其、中歐、東歐、中東同非洲嗰啲。
打骰基金跑輸同業
公司好着緊澄清，話麥樸思喺鄧普頓嘅位置完全無變，連麥樸思自己早排都話無打算退休或做少啲。
不過，好難唔諗麥樸思退下火線，話晒佢今年都已78歲，金融世界好現實，佢揸Fit咗廿幾年嘅呢隻「鄧普頓新興市場基金」，雖則面世28年嚟回報有成33倍，但過去5年平均每年蝕0.3%，跑輸同業，連鄧普頓主席史密斯都開過口話「好失望」。不過，點都好啦，麥樸思喺絲絲心目中始終佔重要位置。
余絲韻