內地二○○一年大跌市時，大部分股民都仲係喺證券行打住躉嚟心噏；到二○○七年嗰次大跌，啲股民係對住部電腦眼濕濕；呢次大跌市，股民多數係睇住部手機嚟急，炒股App一定要有。內地股民呢排跌市點忙法，炒股App大數據下現晒形。
股市愈波動，炒股App用戶就愈活躍，每逢滬指大跌或重大利好政策出台後第二個交易日，炒股App用量即勁升。呢兩星期最活躍係邊日？就係七月一日滬指大跌5.23%之後嗰日。
仲有，啲App嘅用量變化，直頭與股市開市休市完全同步，股民同啲App好似跳Tango一樣。
每日朝早大概七點鐘左右，啲炒股App嘅活躍度就會開始激增，明顯係股民一起身就叫醒埋啲App。九點開市之後一個鐘，係全日第一個高峰；到中午休市，股民依然唔休，活躍程度維持到收市。
收市後會歇歇，夜晚七點再嚟過，到九點就係全日第二個高峰，事關股民要賽後檢討。
咁啲股民用邊隻手機多？Android機中，最多用三星，有三成；其次係華為同小米，各大概兩成；之後係魅族同酷派，只得3至4%左右。
余絲韻