絲絲講場：恒生演活制水苦況
八號風球大家見得多，但講到制水，太後生嘅就未必經歷過。恒生（00011）今年第二年支持饒宗頤文化館嘅獎勵計劃，為咗鼓勵中學生認識香港歷史，今年特登搵咗18位同事同班中學生一齊排戲，模擬阿爸阿媽想當年制水嘅情景。
絲絲尋日去文化館見到班同學仔演得非常投入，恒生副董事長兼行政總裁李慧敏（Rose）仲睇到拍晒手掌。
展覽香港舊照片
Rose就話，恒生係一間香港人嘅銀行，喺獅子山下同港人經歷唔少風浪，見證香港經濟發展，所以今次恒生除咗派同事出嚟排戲，仲提供咗唔少歷史相片做展覽，包括40年代恒生銀號喺永樂街舊舖，同70年代推出恒生指數時嘅舊相。
余絲韻