Market Insight：挾淡倉威力有眼睇

經歷周三的大時代，中資熱錢洗倉洗得八八九九，尋日港股終於絕地反擊，恒指最多升1,179點，尾市升幅收窄，仍升876點，收24,392點，主板成交2,120億元。

尋日的反彈究竟有幾咁誇張？單睇升幅達八成的漢基控股（00412），都只能排喺升幅榜第24位，全日超過千七隻股票升，將前日九跌一升的市況，逆轉變成九升一跌，七月九日可算是普羅股民的大奇迹日也。

值得一提，外資依然對A股抱相當戒心，尋日滬股通埋單額度有164.7億元人仔，意味淨沽凸約34億元人仔，對比本周一開始，淨沽133億、102億、65億元人仔，毫無疑問已經收斂些少。但見香港無論藍籌、國企及二三四線股，以內地術語所講，係出現井噴式爆升，班外資依然隊住個A股，香港同內地邊個市抵博一啲，經已畫公仔畫到出腸。

大媽掃貨意料之外

估唔到係北面大媽一面喊救命，居然一路落嚟香港掃貨博反彈，港股通105億元人仔南向額度用剩87.56億元，乃內地救市以來首見。於港股通名單中，升幅首位順風清潔能源（01165）升41.5%，跟住已經到阿里孖寶，阿里影業（01060）及阿里健康（00241）分別升38.4%及35.7%，當中又以阿里影業較有鑊氣，全日成交金額達13.3億元。

尋日提到，首日掛牌遇啱跌市的培力控股（01498），勁升30.5%，收5元，升幅勁過行家兼對手中國中藥（00570）的16.9%。啱啱低價畀私募基金海峽匯富減持的海通證券（06837），大升市復牌收13.82元，同批股價11.12元相比，接貨者一日就執咗兩成四，都唔知係佢哋有運抑或海峽匯富黑仔。

尋日有兩間內地券商股發出盈喜，就係啱啱掛牌的國聯證券（01456），預告半年歸於股東的淨利潤錄得非常大幅增加，而廣發証券（01776）預告半年淨利潤達83.55億至84.55億元人民幣，按年勁升3.98至4.04倍。

希臘有機大步檻過

買股票同揸車一樣，睇前方而唔係望住倒後鏡，隨住A股泡沫洩氣，因為國家托市，券商無端端又要出錢掃埋一份，再者孖展客最後找唔找到數仲係未知之數，券商股下半年業績的不確定性多到極，實在唔多適合風格保守的股民博反彈。

狂升之後，睇怕今日升勢點都要抖一抖，內地證監陸續逼打茅波停牌的過千間股份恢復買賣，A股震盪難免，其次希臘與債權人談判周末就去到死線，斷估害怕賭大細的基金經理都唔會揀周五至嚟賭鋪勁。上周日公投結果通地眼鏡碎，不過畀小弟要估，都覺得本周日大步檻過機會比較大，近排十年希債息級級上，執筆時去到18.5厘，債商已經私下六六折大平賣，在有心理準備要hair cut與無心理準備的total lost之間二選一，你又估佢哋會點揀？

中國最大資產管理公司華融，吹風吹得好勁，會無懼市況，鐵定今季內招股上市，華融一類的金融收賣佬，專門在經濟周期逆行、銀行要大刀闊斧剝離不良資產中得益，通常100元的不良資產，會以九成以上折讓，由銀行賣畀四大不良資產管理公司，之後佢哋會將之分類，爛數收到就收，收唔到就睇吓有冇變賣價值。

信達可炒影子概念

簡單講，就係由垃圾堆中找尋剩餘價值，今次華融集資規模唔細，估計超過230億元，預計會由中金、花旗、高盛、滙豐及工銀國際等聯席保薦上市。

市面上唯一同類選擇，係一三年經已上市的中國信達（01359），睇番近期股災，佢股價個半月由5.1元隊到依家3.65元，但盤數絕對唔失禮，由一一年賺67.6億元人仔，去到舊年賺118.6億元人仔，三年累升七成五，啱啱先開始銀行壞帳回升之周期，一五年PE連7倍都唔到，由於估值風險已經有限，加埋有華融上市的影子概念可炒，古勝認為博反彈應該有揸拿。

古勝