尋日喺A股廢堆裏，畀絲絲（目及）到「郭樹清」個名，就係之前做開中證監主席，又空降山東做省長嗰位。佢接受專訪時被問到點睇內地財富管理？佢劈頭就一句「我現在只是一個地方政府負責人」。絲絲硬係Feel到呢句好似「涼涼哋」咁。
記得一二年底，佢仲做緊中證監主席時，滬深股市連2,000點大底都穿埋，郭樹清即刻做咗箭靶。佢為平息民怨，仲出嚟講咗「監管機構要對股市下跌承擔一定責任」！
郭樹清係朱鎔基與王岐山嘅愛將，係「有想法、有辦法」嘅金融人才，做過央行副行長、外匯管理局局長、建行董事長，佢一一年出任中證監主席，點知做唔夠兩年就調咗去山東做地方諸侯。不過，塞翁失馬，焉知非福。呢排A股水深火熱，郭樹清唔知有冇覺得山東地方「涼浸浸」呢可？
余絲韻