絲絲講場：1929美股災A貨抄到足
近排A股大冧市，上星期六21家內地券商立即「吹雞」話合資1,200億人仔嚟托市，絲絲耳邊即刻好似聽到「暗湧」，事關個場景咁似一九二九年華爾街股災！嗰次又係成班Banker坐埋傾買股托市呢招。結果歷史話畀大家聽，嗰次止瀉過唔到一個禮拜，之後就係大蕭條！「歷史在重演，這麼煩囂城中……」
喺八十六年前，相距7,300哩嘅美國華爾街，喺一九二九年十月二十四日股市大冧，成為「黑色星期四」。
華爾街夾錢托完再冧
當日，一班華爾街Banker，包括摩根、大通、花旗咁，同樣吹雞開救市大會，又係諗出買股托市呢招。佢哋買入鋼鐵股同藍籌股。就係咁，當日叫做止住吓瀉。點知，過咗周末，到星期一再瀉13%，之後三星期仲冧多34%！之後就係「大蕭條」。
返番嚟二○一五年，A股食咗瀉藥，上星期六中國證券業協會嘅21內地券商坐低，決定一齊「揼水」1,200億人仔托市，買藍籌股ETF等。絲絲只係諗起一個字：邪。
千二億恐掉落鹹水海
雖則話今次啲內地券商全部猛料，有中信証券、國泰君安、招商証券咁，但亦有策略師潑冷水，話嗰1,200億人仔杯水車薪，掟入個市唔使一個鐘「咋咋聲」影都冇。
尋日滬綜指升番2.41%，但深成指同創業板仲分別跌緊1.39%同4.28%。最後會唔會係二九年翻版？絲絲唔敢講。不過，華爾街背後得位湯姆叔叔，而今次A股背後有阿爺，輩份級數唔同喎。
余絲韻