絲絲講場：券商出女神 紅色誘股民

柳岩紅衫難敵冧市

話說內地券商廣發証券，尋日出動內地性感女神柳岩，透過即時視像通訊教客網上開戶，廣証仲話「一邊看美女，一邊掙大錢」，一次過滿足晒唔少人嘅兩個願望。

女神尋日着住件火辣辣紅衫，似乎係想旺到A股「滿江紅」，不過現實邊有咁美好，睇返尋日個市，女神似乎着綠色衫先夠應景。何解？是關內地股市習慣紅色標示升市，綠色代表跌市。

美人計行銷一定掂？

有人質疑券商用美人計嘅做法，仲話咁同「髮廊、桑拿、按摩院、KTV會所有啥分別」。不過廣証一於好少理，照喺微博問人想唔想「和女神面對面接觸，聽女神酥麻的聲音，接受柳岩的服務」。

你都想試吓隔住個Mon心跳加速？Sorry，呢個「股民福利」只限一日，唔知有幾多勇士為咗女神願意開戶上戰場呢可。

唔熟柳岩？佢就係N年前同黃宗澤傳過緋聞嗰位，喺內地又拍劇又做主持，依家連股市都關佢事。

靚女同股市風馬牛不相及？自古以來股壇同靚女分唔開是常識吧！咪唔記得香港一代又一代嘅輪后同小花，就算個市幾咁無起色，得佢哋，股民嘅人生先仲有啲啲希望。

余絲韻