絲絲講場：恒生水哥畫花塊面籌錢
人稱「水哥」嘅恒生銀行（00011）傳訊及可持續發展總監張樹槐（Walter），甘願畫花塊面去籌錢。乜事？關苗圃嘅事。
講到「水哥」，眾所周知佢係跑得之人，有幾跑得？佢足足跑過50個馬拉松，仲係第一個跑完珠峰馬拉松嘅香港人。
挑戰慈善越野馬拉松
「水哥」今次係幫「苗圃越野馬拉松」籌款，亦係佢第二次做「苗圃挑戰12小時慈善越野馬拉松」嘅挑戰大使。佢會喺十一月一號參加42公里嘅慈善越野馬拉松。今次唔止水哥自己一個跑，佢仲發咗英雄帖向同事挑機，邊位？就係恒生中國同事楊子江、恒生IT部門嘅Alex同埋佢行政助理Pauline。
話說「水哥」今次嘅挑機路線都唔短，一共42公里，由油塘三家村出發，會經過獅子山、金山同埋城門郊野公園，終點站喺大埔吐露港公路嘅香港教師會李興貴中學。
「水哥」今次唔單止「畀錢」，仲「畀面」，事關佢交埋塊面出嚟，畀化妝師畫上「CH 12Hrs」嚟拍呢次嘅「畀面‧挑戰」宣傳短片。聽講，接受「畀面‧挑戰」嘅，仲有藝人江美儀、張繼聰同埋蔡瀚億（Baby John）添。
余絲韻