絲絲講場：四叔外孫女搞商場學接班
講明話要安排接班嘅恒地（00012）主席四叔李兆基，大家焦點一向都放喺佢兩位公子身上，但絲絲今次就預先介紹吓恒地第三梯隊，四叔外孫女李敬恩畀大家識，佢將會以「千色匯」商場系列項目總監身份亮相，顯示四叔咁多瓣生意都陸續搵到人接班嘞。
構思千色匯新形象
其實早喺○六年，絲絲已經見過李敬恩（Kristine），當時佢陪同爹哋媽咪（即是四叔大女佩雯同女婿李寧），一齊出席城大學生宿舍李兆基堂命名，嗰陣Kristine都只係少女一名，眨眼已經9年，Kristine已經喺史丹福大學畢業，又做咗幾年Banker，一二年就返咗恒地幫四叔手。
依家Kristine已經係恒地租務部助理總經理，下星期一會初挑大樑主持「KOLOUR元朗千色匯」開幕。聽講恒地旗下原來嘅元朗千色廣場，同埋荃灣城市中心完成翻新，將會改用「千色匯」品牌系列，構思就係嚟自Kristine，呢兩個場未來會否搞得起，就要睇Kristine嘅管理能力，絲絲拭目以待。
余絲韻