絲絲講場：朱仔5大預言顯財路?
朱克伯格當年讀緊書能夠諗得出facebook呢條橋，就知佢比其他人行前有幾多。朱仔佢最近就預言咗人類未來最熱爆嘅發展，以下一次過數畀你睇。似睇緊科幻小說？未必。仲記得你五年前部手機係用嚟做乜嗎？諗吓有冇財路好過啦！
1.虛擬實境
朱仔好睇重虛擬實境（Virtual Reality）嘅發展，第一樣就講呢樣。虛擬實境，即是大家打機打到好似現場一樣嗰啲，明啦。依家大家Share相當食飯，朱仔覺得將來會透過虛擬實境技術直頭Share整個3-D影像、感覺同經驗。點搞？就係靠啲人體穿戴科技，所以朱仔自己舊年咁重手用30億美元收購Oculus囉。
2.心靈感應
家陣有啲人乜都Send Message，連求愛分手辭職，都可以唔使見面開口。嗱，朱仔話，將來連字都可以慳番唔使打，只要Enable咗某啲Friend，你直頭可以連五感同情感都可以即時Send同Share，你快樂所以佢快樂，心靈感應一樣。
3.高智長壽超人類
人可否得永生？對朱仔嚟講，呢個唔係宗教問題，而係可見嘅人類將來，佢認為科技繼續走落去，人類大腦開發可以比依家高一百萬倍，所有病都有得醫，會出現高智長壽超人類。
4.人工智能
大家對機械人已經見怪不怪，朱仔都認為機械人仲有大把潛力。唔單止係做體力勞動，未來機械人仲會識得自己睇嘢聽嘢、理解圖片同影片，之後仲可以解番畀人類聽。朱仔仲話，十年之內就得。
5.天際網絡
網絡有幾重要？Wifi慢啲，睇怕你都會發癲。朱仔話，將來嘅世界，會全面有網絡覆蓋，會由無人機、衞星經激光Beam落地。絕對唔係天方夜譚，有人已經做緊。
余絲韻