Market Insight：乳業股有條件反彈

古勝猶記得港交所（00388）行政總裁李小加剛剛先盛讚A股係最安全且透明的股市，真係唔識就嚇死，識就笑死。

先旨聲明，在下倉底幾時都有貨底喺度，當然唔會黑心到想個股市冧檔，但睇見作為「央媽」的人行，由上星期六「雙降」開始，轉頭搵剛剛話要規範兩融的中證監，來個「今日的我打倒昨日的我」，話兩融仲有上升空間，跟手似層層傳國家隊用退休金入市掃貨，再來減交易徵費及傳減印花稅，愈想個市唔跌，結果托市托到亂晒章法，情況猶如黑仔玩show hand，輸乾輸淨前，想個來偷雞大翻身，慌失失「晒冷」一樣。

現實歸現實，去年十一月央媽第一次減息至今，內地經濟數據睇唔到有重大改善，瘋狂的流動性只係頂住個樓價唔跌，股市狂升，股民前仆後繼咁入市，源於對中央反貪及國企改革突然信心爆棚，再加埋央媽狂放水浸起股市。

斬倉潮難免跌過龍

然而，要知股市表現講到底都要同經濟及企業營收掛鈎，無可能長期脫節，尤其內地大媽被熊市折磨七年，今次驚死執輸，唔少借爆孖展，由滬深兩市之前成交屢破世界紀錄可見，當過分槓桿的股市一爆，斬倉潮之下，跌過龍亦都在所難免，亦都唔係央媽想托就托得起。

反而喺四月份狂升咗幾日，之後一直完全唔肯跟A股癲的港股，似乎仲有一絲希望。當然，由四月初高位累積跌幅介乎五成至九成的二三線股，古勝相信中短線恐怕都好難返回家鄉，但地產同電訊一類較正路的藍籌及中型股，周日希臘公投定生死之後，應該可以搵到支持。

今次希臘搞到咁大劑，始作俑者係年初被希臘人民推上總理一職的左翼聯盟領袖齊普拉斯，帶領整個談判，居然同IMF傾以債養債，臨埋門仲要搞全國公投，實行交番個波畀國民，推卸所有政治責任。

希臘事件大致反映

網上見爛仔總理講近兩日依然出力，慫恿國民周日投票，向債權人協議「說不」，講緊唔係叫希臘人捱過國家破產的陣痛，反而主張即使違約，歐盟都無權即時踢希臘脫歐，等同向全國鼓吹一味撒賴。

他的行徑實在令在下眼界大開，心裏真係想睇希臘計錯數被踢出歐元區一了百了。姑勿論點都好，較難掌握只係市場到底反映多少「Grexit」一刻的震盪，由歐元到依家都未再試上次1.05低位，個人主觀覺得周日結果無論係點，港股狂插機會唔多，反正這幾星期已經行先一步，今日會諗住酌量買些少港股ETF，博有意外驚喜。

講番昨日個市，喺A股再瀉之下，恒指仲有32點進帳，講到尾，六月半年結基金經理不斷減磅之後，無可能成手現金等運到，多多少少都要搵番啲股票買，冧得最早的濠賭股，即使短期睇唔到營收有改善，但潛在跌幅可能比大市少，已經係佢哋狂吸的理由，亦都頂住昨日恒指唔跌，反觀二三線股則係屍橫遍野，超過千三隻股票插水。

若然硬要扒逆水的，可以留意乳業股以及今浪跌得相當多的汽車股華晨（01114）。近月麻麻的汽車銷售數字，已經在過去兩個月華晨股價的弱勢反映得七七八八，反而下半年開始推X1系統SUV及2系寶馬，好大機會推番高個銷售數字。

合生元見收集手影

至於乳業股，原乳價大跌之後，伊利股份（600887.SH）同蒙牛乳業（02319）兩隻龍頭，本身毛利率就有一定的好處，近年兩間公司都朝着高端乳製品，拓闊毛利的方向發展，唔少分析指表現比佢哋預期好。蒙牛高位落咗唔少，預期市盈率21倍左右，已經可以諗諗。

早幾日，工信部搞個嬰幼兒配方奶粉企業兼併重組工作會議，簡言之內容又係朝行業整合，淘汰落後的中小型產能，扶持及優化產業升級之餘此類，見基金股合生元（01112）今轉由41.59元殺到落21元唔見一半，近幾日低位成交多番唔少，似有大戶收集迹象，可以睇實。

古勝