絲絲講場：周文耀：創科要鼓勵失敗
港交所（00388）前行政總裁周文耀喺一個午餐會致詞時，講起本港創新科技企業就慨嘆，「喺香港，做錯任何事，都係畀人批評，唔會話受到鼓勵。」佢覺得呢種文化要改一改，唔好覺得失敗係一件醜事。
佢話自己去過硅谷，覺得當地文化好唔同，啲人反而會鼓勵失敗，認為失敗10次，第11次就會成功。佢勉勵大家：「失敗並唔係永恒，最重要就係當中得到啟示，喺錯誤中學習，最終係會成功嘅。」
百本唔跟風搞App
周文耀個演講的確非常勵志，但佢身為港交所前行政總裁，媒體亦好關心佢對市場動向睇法。當有人問佢點睇同股唔同權，佢又重申自己離開港交所崗位，不會回應，叫記者「去問李小加」。咁又係嘅，所謂「不在其位，不謀其政」呀嘛。
講開又講，每逢有企業創新議題，一般演講者都會講吓話香港要多啲創新、鼓勵年輕人創業之類嘅話，不過同場嘅百本醫護（08216）主席關志康就強調創新係「唔好人哋做你又做」。佢舉例話，有人建議佢公司搞個App畀人上網搵看護，但佢不以為然，話「如果佢（客人）要搵看護，佢想打電話嚟即刻有人聽，定係Download你個App再喺上面『』呢？佢鍾意邊一樣呢？」
其實，以百本醫護嘅私家看護業務為例，唔少需要該服務嘅都係公公婆婆，公司慳番啲錢唔搞App都係好合理嘅。
余絲韻